გასულ კვირას გამოქვეყნებულ ღია წერილში პოლონეთში მივლენილმა 50 სახელმწიფოს ელჩმა და საერთაშორისო ორგანიზაციის წარმომადგენელმა პოლონეთს ქვეყანაში მყოფი ლესბოსელი, გეი, ბისექსუალი, ტრანსგენდერი და ინტერსექსი ადამიანების დაცვისაკენ მოუწოდა.

განცხადება ქვეყანაში ქვიარ ადამიანების მდგომარეობის გაუარესების შემდეგ გავრცელდა. LGBTQ თემის წევრები მუდმივად იღებენ მუქარას მემარჯვენე მთავრობისგან, ადგილობრივი მოსახლეობისა და კათოლიკური ეკლესიისგან.

ქვეყნის პრეზიდენტი ანჯეი დუდა და კანონმდებლები ღიად ესხმიან თავს LGBTQ თემს და მას ტრადიციული ოჯახისთვის ზიანის მიყენებაში ბრალს სდებენ.

"ადამიანის უფლებები საყოველთაოა და ყველამ, მათ შორის LGBTQ ადამიანებმაც, შეუზღუდავად უნდა ისარგებლონ საკუთარი უფლებებით", — ნათქვამია დიპლომატების ღია წერილში.

"პატივი ეცით იმ ფუნდამენტურ უფლებებს, რომელიც სახელმწიფოს ავალდებულებს, საკუთარი მოქალაქეები ძალადობისა და დისკრიმინაციისგან დაიცვას და ადამიანები თანასწორი შესაძლებლობებით უზრუნველყოს".

წერილში ხაზგასმულია პოლონურ საზოგადოებაში LGBTQ ცნობიერების ამაღლების საჭიროებაზეც.

ხელმომწერთა შორის კი არიან წამყვანი დიპლომატები ევროკავშირის სხვადასხვა ქვეყნიდან, მათ შორის გერმანიიდან. ასევე იაპონელი და ავსტრალიელი ელჩებიც.

ღია წერილი ტვიტერის საკუთარ ანგარიშზე გამოაქვეყნა ჯორჯეტ მოსბეკერმა, აშშ-ის ელჩმა პოლონეთში და დასძინა, რომ ადამიანების უფლებები იდეოლოგია არ არის.

წერილს ხელს აწერენ გაეროს და ევროკავშირის ოფიციალური წარმომადგენლებიც.

პოლონეთის პასუხი

წერილს გამოეხმაურა პოლონეთის საგარეო საქმეთა მინისტრის მოადგილე, პაველ იაბლონსკი, რომელმაც განაცხადა, რომ პოლონეთის მთავრობა სრულიად ეთანხმება წერილის შინაარსს და "ქვეყნის კანონმდებლობით ყველა ადამიანის თანასწორობა უზრუნველყოფილია".

"შეხსენებად" იგი დასძენს, რომ "პოლონეთის კონსტიტუციის თანახმად, ქორწინება ქალსა და კაცს შორის კავშირია".

იაბლონსკის თქმით, ეგრეთ წოდებული LGBTQ-სგან თავისუფალი ზონები — ქვეყნის ის ქალაქები, რომლებმაც საკუთარი თემი ქვიარ ადამიანებისგან თავისუფალ ზონებად გამოაცხადეს — "ცრუ ინფორმაციაა" და რეალურად, არ არსებობს.

გასულ თვეში პოლონეთის LGBTQ თემის მხარდასაჭერი ღია წერილი გამოაქვეყნეს ცნობილმა ადამიანებმაც, რომელთა შორის მარგარეტ ეტვუდი და ჯეიმს ნორტონიც არიან. წერილი პოლონეთის მთავრობისგან ქვიარ ადამიანების დევნის შეწყვეტას, ევროკავშირისგან კი დაუყოვნებლივი ზომების მიღებას მოითხოვდა.