საზოგადოებრივი მაუწყებლის დირექტორობის კანდიდატმა, ირმა სოხაძემ სამეურვეო საბჭოსთან გასაუბრებისას არქივის შესახებ დასმული კითხვის პასუხად განაცხადა, რომ ეს მისი მტკივნეული თემაა, რადგან მაუწყებლის არქივში მისი ბევრი გადაცემაა შენახული, მათ შორის რუსი მომღერის, ალა პუგაჩოვას ავტოგრაფი გამოყო.

"[საზოგადოებრივი მაუწყებლის არქივის] ძალიან დიდი ნაწილი ჩემი შექმნილია. აი, ოქტაგონები, ბენეფისები, ავტოგრაფი, ეს ჩემი საავტორო გადაცემა იყო. დღეს იმედს აქვს და ღმერთმა შეარგოს, ძალიან კარგია. მე მქონდა ავტოგრაფი, შეგიძლიათ ნახოთ, აქ არქივშია დაცული. ძალიან ბევრი გადაცემა, ვის არ გავუკეთე, რავიცი, ალა პუგაჩოვას ავტოგრაფიც კი მაქვს არქივში. სტუმრების ანუ, არაქართველების", — განაცხადა მან.

გაიგეთ მეტი ირმა სოხაძის ხედვებსა და გასაუბრებაზე:

საზოგადოებრივი მაუწყებლის დირექტორის ხელფასი 4 ათასი ლარიდან 10 ათას ლარამდე გაიზრდება. გადაწყვეტილება თანამდებობრივი სარგოს გაზრდაზე სამეურვეო საბჭომ ერთხმად დაამტკიცა.

ამჟამად საზოგადოებრივ მაუწყებელში გენერალური დირექტორის პოზიციაზე შესარჩევი კონკურსი მიმდინარეობს. კონკურსის მეორე ტურში გადავიდნენ თინათინ ბერძენიშვილი, ირმა სოხაძე, ხათუნა ლაგაზიძე და ალექსანდრე ვახტანგოვი. თუმცა, ვახტანგოვმა კანდიდატურა მოხსნა.

საზოგადოებრივი მაუწყებლის გენერალური დირექტორის თანამდებობა ვაკანტური მას შემდეგ გახდა, რაც ვასილ მაღლაფერიძემ თანამდებობა დატოვა. მაღლაფერიძის მტკიცებით, გადადგომის მიზეზი ის არის, რომ არ სურს წინასაარჩევნო პერიოდში გაჩნდეს კითხვები არხის მიკერძოებულობასთან დაკავშირებით.

გენერალურ დირექტორს თანამდებობაზე ნიშნავს სამეურვეო საბჭო ღია კონკურსის წესით, 6 წლის ვადით.