საზოგადოებრივი მაუწყებლის დირექტორობის კანდიდატმა, ალექსანდრე ვახტანგოვმა კანდიდატურა მოხსნა მას შემდეგ, რაც საბჭოს წევრებს მაუწყებელთან დაკავშირებით საკუთარი ზოგადი ხედვა გააცნო. გამოსვლის ბოლოს მან მხარი სხვა კანდიდატს, თინათინ ბერძენიშვილს დაუჭირა.

"ძალიან კარგი გოგოა, ალბათ, იმას აირჩევთ. ჩემთან არის ნამუშევარი, ვიცნობ და ნამდვილად ჭკვიანი და კარგი გოგოა", — განაცხადა ვახტანგოვმა.

მან საუბრის დასაწყისში აღნიშნა ისიც, რომ დღევანდელ შეხვედრაზე მოსვლას არ აპირებდა, რადგნ პირველი ტურის შემდეგ შეექმნა წარმოდგენა, რომ საბჭო უკვე ჩამოყალიბებული იყო, ვის აირჩევდა ამ პოზიციაზე. მისივე თქმით, გასაუბრებაზე მისვლა მაინც გადაწყვიტა, ხოლო საუბრის დასასრულს კანდიდატურა მოხსნა.

ამჟამად საზოგადოებრივ მაუწყებელში გენერალური დირექტორის პოზიციაზე შესარჩევი კონკურსი მიმდინარეობს. კონკურსის მეორე ტურში გადავიდნენ თინათინ ბერძენიშვილი, ირმა სოხაძე, ხათუნა ლაგაზიძე და ალექსანდრე ვახტანგოვი.

საზოგადოებრივი მაუწყებლის გენერალური დირექტორის თანამდებობა ვაკანტური მას შემდეგ გახდა, რაც ვასილ მაღლაფერიძემ თანამდებობა დატოვა. მაღლაფერიძის მტკიცებით, გადადგომის მიზეზი ის არის, რომ არ სურს წინასაარჩევნო პერიოდში გაჩნდეს კითხვები არხის მიკერძოებულობასთან დაკავშირებით.

გენერალურ დირექტორს თანამდებობაზე ნიშნავს სამეურვეო საბჭო ღია კონკურსის წესით, 6 წლის ვადით. ამასთან, საზოგადოებრივი მაუწყებლის დირექტორის ხელფასი 4 ათასი ლარიდან 10 ათას ლარამდე გაიზრდება. გადაწყვეტილება თანამდებობრივი სარგოს გაზრდაზე სამეურვეო საბჭომ ერთხმად დაამტკიცა.