პურის მცხობელთა ასოციაციის თავმჯდომარის, მალხაზ დოლიძის განცხადებით, პურზე ფასის ზრდა არ იგეგმება, თუმცა თუ ეს მოხდა, შესაძლოა, 10 თეთრით გაიზარდოს. მისი თქმით, პურის მცხობელები ფასებს შიდა მოგების ხარჯზე ინარჩუნებენ.

"თუ ასეთ მდგომარეობაში ვიქნებით პურზე ფასი არ გაიზრდება. უნდა შეივსოს მარაგი, ამაზეც მუშაობენ ფირმები, შემოგვაქვს ხორბალი, რამდენადაც ვიცი არის ორი სამი თვის მარაგი, რომ ფასი არ შეიცვალოს. ბირჟაზე ყოველთვის მუშობს საბაზრო ეკონომიკის პრინციპები და ამ პრინციპით თუ იმუშავებს ბაზარი, თავის ატკიების მიზეზი არ გვექნება, მაგრამ თუ მოხდა ისე, რომ ყველაფრის ფასმა მოიმატა, ამ შემთხვევაში პურის ფასის ზრდა 10 თეთრამდე შეიძლება ვივარაუდოთ", — განაცხადა მალხაზ დოლიძემ.

მისივე მოსაზრებით, პურის ფასთან დაკავშირებით აჟიოტაჟი ძირითადად ლარის კურსის ცვლილებამ განაპირობა და ფასის შენარჩუნებას მწარმოებლები გაზრდილი დანახარჯების პირობებში მოგების შემცირების ხარჯზე ახერხებენ, აქედან გამომდინარე, მუშაობს ის, ვინც ამ ხარჯების ზრდას უძლებს.