გია გაჩეჩილაძემ დღეს ტელეკომპანია პირველის ეთერში განაცხადა, რომ მაესტროს საკონტროლო წილის მფლობელი აღარაა. მან დასძინა, რომ თავისი წილი ინა გუდავაძეს გადასცა, რომელიც მისი თქმით, ერთი ჰოლდინგის ქვეშ გაერთიანებული სამივე ტელევიზიის [იმედი, მაესტრო, GDS] მმართველი იქნება:

"ვინც რა შეთქმულებას ხედავს, ეს მისი ეჭვიანობის ბრალია. ეჭვიანობა ავადმყოფობაა და გადაეცით მამუკა ღლონტს. ყველაფერი მოხდა კანონიერად, მეწილეებმა გაყიდეს თავიანთი წილი და ეს წილი შეიძინა ქალბატონმა ინა გუდავაძემ, გააკეთა მედია ჰოლდინგი. ამაში მეც მივეხმარე, მეც ვიყავი ამ პროცესებში ჩართული, რომ ეს წილი არ წასულიყო რუსთავი 2-სკენ და მაესტრო არ გაერთიანებულიყო რუსთავი 2-თან, ამიტომ ჩავერიე მე, ხოლო მთლიანი ჰოლდინგი შეიქმნა ინა გუდავაძის ქვეშ და არა ვიღაც ნიკა გვარამიას ქვეშ".

მან დასძინა, რომ მაესტროს "რჩენის თავი" არ ჰქონდა.

"დავიღალე ყოველდღე იმის ფიქრით, როგორ გავცე ხელფასები და გამოჩნდა ის ადამიანი, ვინც დააფინანსებს ამ ტელევიზიას, ვინც რაღაც ახალს შემოიტანს ამ ჩამყაყებულ ტელესივრცეს და უკეთესობისკენ დაიძვრება პროცესები".

გაჩეჩილაძის თქმით, სამივე ტელევიზია იქნება ერთი ჰოლდინგის ქვეშ, რომელსაც ინა გუდავაძე მართავს.

ამავე თემაზე: