ჰოლდინგმა იმედმა დღეს, 27 დეკემბერს განცხადება გაავრცელა, რომ ტელეკომპანია მაესტროს საკონტროლო პაკეტი შეიძინა და ტელეკომპანია GDS-ის წილის შესაძენად მოლაპარაკებები დასასრულს უახლოვდება.

რა მოხდება იმედის მაესტროსა და GDS-ის ერთ ჰოლდინგში გაერთიანებით?

სამივე ტელევიზია საერთო მაუწყებელია, რაც საინფორმაციო და საზოგადოებრივ-პოლიტიკური გადაცემების განთავსებით მაუწყებლობის უფლებასა და ვალდებულებას გულისხმობს. სამივე მათგანი მთელი საქართველოს მასშტაბით ვრცელდება, აქვთ საინფორმაციო გამოშვებები, პოლიტიკური და გასართობ-შემეცნებითი პროგრამები.

„მაუწყებლობის შესახებ“ კანონში (მუხლი 60) არსებობს ნორმა, რომელიც პირს უკრძალავს ერთსა და იმავე გავრცელების არეალში ფლობდეს ერთზე მეტ საერთო სატელევიზიო არხს. იგივე აკრძალვა ვრცელდება პირზე, რომელიც პირდაპირ ან ირიბად ფლობს მეორე პირის აქციებს ან საწესდებო კაპიტალის წილს, არის მისი თანამდებობის პირი. გარდა ამისა, მისთვის ან მისი აქციონერის, პარტნიორის ან თანამდებობის პირისთვის ასრულებს რაიმე ანაზღაურებად სამუშაოს.

რაც იმას ნიშნავს, რომ ერთ ჰოლდინგში გაერთიანებით ამ სამი ტელეკომპანიიდან - იმედი, მაესტრო და GDS, მინიმუმ რომელიმე ორს საინფორმაციო და საზოგადოებრივ-პოლიტიკური პროგრამების შეჩერება და სპეციალიზირებული მაუწყებლობის დაწყება მოუწევთ. სპეციალიზირებული მაუწყებლობა ძირითადად ერთი თემატიკის მაუწყებლობაა.