2020 წლის საპარლამენტო არჩევნებში პოლიტიკური პარტია რეფორმერი 13 ნომრით მიიღებს მონაწილეობას.

19 სექტემბერს ცენტრალურ საარჩევნო კომისიაში გაიმართა საარჩევნო სუბიექტების წილისყრის პროცედურა. პარტია რეფორმერს ნომერი 13 წილისყრის პროცედურის შედეგად მიენიჭა.

პარტია რეფორმერი ცენტრალურ საარჩევნო კომისიაში დარეგისტრირდა 2020 წლის 10 აგვისტოს. რეფორმერი პოლიტიკურ პარტიად დაფუძნებამდე წარმოადგენდა ახალგაზრდულ პლატფორმას და ახორციელებდა სხვადასხვა სოციალურ, საგანმანათლებლო და კულტურულ პროექტებს რეგიონებში მცხოვრები ახალგაზრდებისთვის. ეს პროექტები მიმართული იყო ქვეყნის სტრატეგიულად მნიშვნელოვანი სფეროების განვითარებისა და სტაბილური ეკონომიკური გარემოს შექმნისთვის.

პარტია რეფორმერმა 2020 წლის საპარლამენტო არჩევნებში მაჟორიტარი დეპუტატობის კანდიდატები წარადგინა ვაკის, მთაწმინდის, ისნის, გლდანის, დიდუბე-ჩუღურეთის, აგრეთვე ბათუმისა და მცხეთა-თიანეთი-დუშეთისა და ყაზბეგის საარჩევნო ოლქებში.

" 2020 წლის საპარლამენტო არჩევნები იქნება რადიკალურად გადამწყვეტი არჩევნები. 30 წელია, ქართულ პოლიტიკაში ერთი და იგივე სახეები ტრიალებს, ისინი გვაძლევენ დაპირებებს ხან ერთი, ხან მეორე პარტიიდან, მაგრამ რეალურად არაფერი კეთდება და ქვეყნისთვის არაფერი იცვლება. ამ პროცესებში იკარგება დრო. რეფორმერი არასდროს გახდება ამ პოლიტიკური პროცესის ნაწილი და ამიტომაც დავიწყეთ ახალი, განსხვავებული პროცესების შექმნა" — განაცხადა თორნიკე ჯანაშვილმა, პარტია რეფორმერის თავმჯდომარემ

მისი თქმით, დღეს საქართველოს წინაშე დგას მწვავე პრობლემები ქვეყნის ყველა სტრატეგიული მიმართულებით, დაწყებული ეკონომიკით დამთავრებული ეროვნული უსაფრთხოებით.

"ჩვენ თავი მოვუყარეთ წარმატებულ, მოტივირებულ და პროფესიონალ ადამიანებს ეკონომიკის, ჯანდაცვის, განათლების, ტექნოლოგიების, უსაფრთხოებისა და სხვა სტრატეგიული მიმართულებებით, რომლებსაც რეფორმერის პლატფორმა აძლევს საჭირო ინსტრუმენტებს და საშუალებებს საკუთარი გამოცდილება და ცოდნა მოახმარონ ქვეყნის განვითარებას.

ჩვენ გვსურს შევქმნათ ახალი, პოზიტიური დღის წესრიგი საქართველოსთვის. სადაც, გადაწყვეტილებებს მიიღებენ პროგრესულად მოაზროვნე, პროფესიონალი, მოტივირებული, მიუკერძოებელი ადამიანები, რომლებსაც შეუძლიათ გაუმკლავდნენ ქვეყნის მართვის თანამედროვე საჭიროებებს. ჩვენი მიზანია ჩვენი გამოცდილება და რესურსი გამოვიყენოთ ქვეყნის განვითარებისთვის და დავამკვიდროთ პოლიტიკის ახალი სტანდარტი", — აცხადებს პარტია რეფორმერის დამფუძნებელი თორნიკე ჯანაშვილი.