ევროპული საქართველოს საარჩევნო შტაბის ხელმძღვანელი, სერგი კაპანაძე, საქართველოს ნატოში ინტეგრაციის პროცესს და ხელისუფლების საგარეო პოლიტიკას ეხმაურება.

სერგი კაპანაძის თქმით, თუ ქვეყანას სურს მიუახლოვდეს ნატოს, მისი დემოკრატია არ უნდა იდგეს კითხვის ნიშნის ქვეშ და მისი მთავრობის პროდასავლურობაში ეჭვი არავის უნდა ეპარებოდეს. კაპანაძემ აღნიშნა, რომ საქართველოს მთავრობამ უნდა აწარმოოს პროაქტიური საგარეო პოლიტიკა და არა ისეთი პასიური, როგორსაც ქართული ოცნების ხელისუფლება აწარმოებს, ამას კი, როგორც კაპანაძე აღნიშნავს, გარდამტეხი ცვლილებები სჭირდება.

"ქვეყანა რომ მიუახლოვდეს ნატოს, უნდა ჰქონდეს ისეთი დემოკრატია, რომელშიც არანაირი კითხვის ნიშანი არ იქნება, უნდა ჰყავდეს ისეთი მთავრობა, რომლის პროდასავლურობაში არავის ეჭვი არ ეპარება და არ უნდა ჰყავდეს მთავრობა, რომელსაც გავრილოვი ჩამოჰყავს ქვეყანაში და იჭერს პოლიტიკურ ოპონენტებს და იყენებს კოვიდს პოლიტიკური ქულების დასაწერად, წირავს ეკონომიკას ამას და არანაირი წინსვლის გეგმა არ გააჩნია. როდესაც ასეთი მთავრობა გყავს, ნატოში ინტეგრაციაზე საუბარი არის ზედმეტი. ამიტომ, ამ მთავრობის შეცვლის შემდეგ, დაჩქარდება ნატოში ინტეგრაციის პროცესი. რუსეთი არის ქვეყანა, რომელიც არის ჩვენი მტერი და აქვს ჩვენი ტერიტორიები ოკუპირებული და ამას იყენებს იმისათვის, რომ შეაფერხოს ჩვენი ნატოში ინტეგრაციის პროცესი. ასეთ რეალობაში, ერთადერთი კონტრზომა ის არის, რომ რუსეთზე იყოს მუდმივი ზეწოლა ჩვენი პარტნიორი ქვეყნებიდან, რომ მან არ გააგრძელოს ამ ფაქტორების გამოყენება ჩვენი დასავლური ინტეგრაციის შესაფერხებლად. მთავარი რაც შესაცვლელია არის ის, რომ პროაქტიური პოლიტიკა იყოს რუსეთთან დიპლომატიური დაპირისპირება და არ ხდებოდეს ილუზიის შექმნა, რომ ჩვენ ორმხრივი დიალოგით ვაგვარებთ პრობლემებს რუსეთთან, რაც არ არის რეალობა. სწორედ ეს არის შესაცვლელი მას შემდეგ, რაც დამარცხდება ივანიშვილი", — განაცხადა სერგი კაპანაძემ.