საზოგადოებრივი ორგანიზაციები მთავრობის მიერ შექმნილი ახალგაზრდობის სააგენტოს ახალგაზრდობის მრჩეველთა საბჭოში არადომინანტური ეთნიკური ჯგუფების წარმომადგენელი ახალგაზრდების ჩართვას ითხოვენ. მათი განცხადებით, 2019 წლის აგვისტოში შექმნილმა ახალგაზრდობის სააგენტომ 23 ახალგაზრდისგან შემდგარი ახალგაზრდობის მრჩეველთა საბჭო ჩამოაყალიბა, რომელიც ქვეყნის ეთნიკურ მრავალფეროვნებას ვერ ასახავს. მათივე თქმით, საბჭო არადომინანტური ეთნიკური ჯგუფის არცერთ წარმომადგენელს არ აერთიანებს.

"მიგვაჩნია, რომ ახალგაზრდობის სააგენტო, რომელსაც აქვს ამბიცია, ახალგაზრდობის მრჩეველთა საბჭოს სახით შექმნას სივრცე, რომელიც იქნებოდა "შესაძლებლობების შემქმნელი პლატფორმა ყველა ახალგაზრდისთვის" სააგენტოს დასახულ მიზანს ვერ ამართლებს", — წერია NGO-ების მიერ გავრცელებულ განცხადებაში.

ორგანიზაციების განცხადებით, მისასალმებელია, რომ სააგენტოს და საბჭოს დეკლარირებული პოზიცია საქართველოს ყველა რეგიონში ყველა ახალგაზრდის საჭიროებების, გამოცდილებების და წუხილების დანახვა, ამ საკითხზე მუშაობა და ქვეყნის დღის წესრიგში დაყენებაა. თუმცა, მათივე თქმით, დეკლარირებული პოზიციის მიუხედავად, ან ისინი სიტყვა "ყველაში" საქართველოს არადომინანტური ეთნიკური ჯგუფების წარმომადგენელ ახალგაზრდებს არ მოიაზრებენ, ან კიდევ არადომინანტურ ეთნიკურ ჯგუფებთან მუშაობის პროცესში მოძველებულ მიდგომებს იყენებენ.

საზოგადოებრივ ორგანიზაციებს მიაჩნიათ, რომ ეს კონკრეტული შემთხვევა საქართველოში არადომინანტური ეთნიკური ჯგუფების გარიყვის, გულგრილობისა და არაღიარების პრაქტიკას და მეთოდებს კიდევ ერთხელ აჩვენებს და ადასტურებს.

EMC-ის გარდა, განცხადებას ხელს აწერენ:

  • პლატფორმა სალამ;
  • სოლიდარობის პლატფორმა;
  • ეი სი თი (ACT) ახალგაზრდული ორგანიზაცია.

ისინი ახალგაზრდობის სააგენტოს მიმართავენ და ახალგაზრდობის მრჩეველთა საბჭოში არადომინანტური ეთნიკური ჯგუფების წარმომადგენელი ახალგაზრდების ინკლუზიას ითხოვენ.

თავად ახალგაზრდობის სააგენტოში აცხადებენ, რომ საბჭოს წევრების შესარჩევად ქვეყნის მასშტაბით ღია კონკურსი ჰქონდათ გამოცხადებული და რომ ოკუპირებული ტერიტორიების შეზღუდვით ახალგაზრდებს საქართველოს ყველა რეგიონიდან იწვევდნენ. სააგენტოში აცხადებენ, რომ რადგან პროექტი საპილოტეა, ახალგაზრდობის აქტივობა დიდი არ იყო, თუმცა, მათივე თქმით, მის პოპულარიზებას ცდილობდნენ.

"აპლიკაციებში მხოლოდ ერთი განაცხადი იყო შემოსული ეთნიკური უმცირესობის წარმომადგენელის, რომელიც პროექტისთვის შეირჩა, თუმცა მალევე პირადი მიზეზების გამო პროექტში მონაწილეობაზე უარი განაცხადა, რაც თავისთავად გულდასაწყვეტია. თუმცა, აღსანიშნავია, რომ საბჭოში წარმოდგენილია თემაზე მომუშავე ორგანიზაცია. კიდევ ერთხელ ხაზს ვუსვამთ, რომ მაქსიმალურად შევეცადეთ ჩვენს ხელთ არსებული რესურსებით გაგვევრცელებინა ინფორმაცია ღია კონკურსის შესახებ, თუმცა ამისდამიუხედავად საპილოტე წელს ბევრი განაცხადი არ შემოსულა", — აცხადებენ სააგენტოში.

ისინი დაინტერესებულ პირებს ოქტომბერში საბჭოს პირველი სხდომისა და ბიუროს ფორმირების შემდეგ, საბჭოში გადაწყვეტილების მიმღებ პირებთან დაკავშირებას სთავაზობენ, რათა მათთან ერთად მომავალი თანამშრომლობის ფორმაზე შეთანხმდნენ.

ახალგაზრდობის სააგენტოს დაფინანსების წყაროები სახელმწიფო ბიუჯეტი, მომსახურების გაწევით მიღებული შემოსავალი და კანონმდებლობით დართული სხვა შემოსავალია.