რამდენიმესაათიანი ლოდინის შემდეგ, გამტაცებლებმა, რომლებმაც ლიბიური ავიაკომპანია Afriqiyah Airways–ის თვითმფრინავი გაიტაცეს, 118 მძევალი გაათავისუფლეს, თავად კი სამართალდამცველებს ჩაბარდნენ.

არსებული ინფორმაციით, ორმა პირმა სამგზავრო ეარბას A320 იმ დროს გაიტაცა, როცა ის ლიბიის ქალაქ საბადან დედაქალაქ ტრიპოლის მიმართულებით მიფრინავდა. გამტაცებლებმა პილოტი აიძულეს, მალტაში გაფრენილიყო. თვითმფრინავი რამდენიმე საათის განმავლობაში მალტის აეროპორტში იყო სპეცრაზმის გარშემორტყმული.

საბოლოოდ, გამტაცებლებმა მძევლები ნაწილ–ნაწილ გამოუშვეს, ბოლოს კი ჩაბარდნენ. როგორც აღმოჩნდა, მათ თან ჰქონდათ ხელყუმბარები და ორი ცეცხლსასროლი იარაღი.

BBC-ის ინფორმაციით, გამტაცებლებს რაიმე კონკრეტული მოთხოვნა არ ჰქონიათ, თუმცა, ერთ–ერთმა გამტაცებელმა ლიბიურ ტელეარხს უთხრა, რომ მათ თვითმფრინავი გაიტაცეს, რათა შეძლონ დააარსონ პრო–კადაფისტური პარტია. ლიბიის მმართველი, მოამარ კადაფი, 2011 წელს, სამოქალაქო ომის დროს ამბოხებულებმა მოკლეს.

ლიბიაში ავიაუსაფრთხოება სერიოზულ პრობლემას წარმოადგენს 2011 წლის ამბოხის შემდეგ. ქვეყნის აეროპორტებს აკონტროლებენ გასამხედროებული დაჯგუფებები, რის გამოც უსაფრთხოების მინიმალური სტანდარტებიც კი არ არის დაცული. ლიბიიდან ევროპის მიმართულებით უკვე რამდენიმე წელია ფრენები აკრძალულია და მოსალოდნელია, რომ დღევანდელი ინციდენტის შემდეგ, შეზღუდვა ძალაში კიდევ დიდხანს დარჩება.