ეროვნულ-დემოკრატიული ინსტიტუტის (NDI) ახალი კვლევის მიხედვით, მოსახლეობის უმრავლესობამ, 59%-მა არ იცის, არჩევნებში ხმას ვის მისცემს. აღსანიშნავია, რომ ბოლო კვლევის შემდეგ ეს მაჩვენებელი 3%-ით გაიზარდა. ვის მისცემს ხმას გადაწყვეტილი აქვს მხოლოდ 36%-ს, ეს მაჩვენებელიც 3 პროცენტით შემცირებულია.

ამასთან, 88% ამბობს, რომ არჩევნებზე სავარაუდოდ წავლენ.

NDI-მ ამჯერად მხოლოდ სატელეფონო გამოკითხვა ჩაატარა და მოსახლეობას ღია კითხვებიც დაუსვა. მაგალითად, "ხვალ რომ საპარლამენტო არჩევნები ტარდებოდეს, ვის მისცემთ ხმას?". უმრავლესობამ არ იცის ან არ ასახელებს იმ პარტიას, რომელსაც ხმას მისცემდა. მოსახლეობის მხოლოდ 27%-მა დაასახელა კონკრეტული პარტია, მათ შორის 17% აქვს ქართულ ოცნებას, 5% ნაციონალურ მოძრაობას, ასევე 5% სხვა პარტიებს.

გარდა ამისა, მოსახლეობის ის 73%, ვინც ამბობს, რომ არჩევნებზე აუცილებლად წავა, 39% ამბობს, რომ არ იცის ხმას ვის მისცემს, 24% კითხვაზე პასუხს არ სცემს, 21% ქართულ ოცნებას ასახელებს, 5% — არც ერთ პარტიას. 4% აქვს ნაციონალურ მოძრაობას და 6% სხვა პარტიებს.

გარდა ამისა, ის ადამიანები, რომლებიც აცხადებენ, რომ მიიღებენ არჩევნებში მონაწილეობას და გადაწყვეტილი აქვთ ვის მისცემენ ხმას, გამოკითხულთა 32%-ს შეადგენს. მათი 41% ქართულ ოცნებას ასახელებს, 8% ნაციონალურ მოძრაობას, ხოლო 9% სხვა პარტიებს.

"ინდივიდუალური პარტიების მაჩვენებლები იმდენად დაბალია, რომ არჩევნების შედეგების გამოსაცნობად ვერ გამოდგება. ამ გამოკითხვისა და არჩევნების შედეგები მნიშვნელოვნად
განსხვავებული იქნება, რადგან არჩევნების ბედი გადაუწყვეტელი ამომრჩევლის ქცევაზე იქნება დამოკიდებული", — აცხადებენ NDI-ში.

NDI-ს კვლევის ყველა ინტერვიუ ჩატარდა სატელეფონო მეთოდით. გამოიკითხა 2 045 ადამიანი საველე სამუშაოები მიმდინარეობდა 6-11 აგვისტოს. კვლევის საშუალო ცდომილების ზღვარია +/- 1.3%.

ორგანიზაციის განცხადებით, რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით შეირჩნენ. NDI-ს ინფორმაციით, ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. მათივე თქმით, კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით).