ამომრჩევლის სავარაუდო მოსყიდვა, ამომრჩევლის გულის მოგებისთვის დაანონსებული პროექტები, სავარაუდო ზეწოლა და ძალადობა, კამპანიაში ეკლესიის ჩარევა და ა.შ. — ეს ის საკითხებია, რომელსაც სამართლიანი არჩევნების (ISFED) წინასაარჩევნო მონიტორინგის მესამე შუალედური ანგარიში ეხება.

ანგარიშში ძირითადად განხილულია 2020 წლის 4 აგვისტოდან 5 სექტემბრის ჩათვლით პერიოდი, აგრეთვე მოვლენები, რომელთა განვითარება 4 აგვისტომდე დაიწყო.

ISFED-ის დაკვირვებით, საანგარიშო პერიოდში გამოვლინდა:

• ამომრჩეველთა სავარაუდო მოსყიდვის 17 შემთხვევა;
• წინასაარჩევნოდ, ამომრჩევლის ფართო მასების გულის მოსაგებად ხელისუფლების მიერ ინიცირებული 2 პროექტი;
• სავარაუდოდ, პოლიტიკური ნიშნით სამსახურიდან გათავისუფლების 3 შემთხვევა;
• სავარაუდოდ, პოლიტიკური ნიშნით განხორციელებული ზეწოლა/მუქარის 4 შემთხვევა;
• სავარაუდოდ, პოლიტიკური ნიშნით ფიზიკური ძალადობის 1შემთხვევა;
• ადმინისტრაციული რესურსის სავარაუდო გამოყენების 18 შემთხვევა;
• ეკლესიის წინასაარჩევნო კამპანიაში ჩარევის 6 შემთხვევა;
• მედიის საქმიანობისთვის სავარაუდო ხელის შეშლის 2 შემთხვევა;
• ასევე, პოლიტიკური შინაარსის პლაკატების დაზიანების შემთხვევები 13 მუნიციპალიტეტში.

ორგანიზაციის შეფასებით, საანგარიშო პერიოდში ამომრჩეველთა სავარაუდო მოსყიდვისა და ადმინისტრაციული რესურსის გამოყენების ნიშნები, საარჩევნო გარემოს მთავარ გამოწვევად რჩება. როგორც ისინი აცხადებენ, მმართველი პარტიის მიერ ამომრჩევლის სავარაუდო მოსყიდვის მცდელობების გარდა, დაფიქსირდა ამომრჩეველთა მოსყიდვა პატრიოტთა ალიანსისა და თავისუფალი საქართველოს მიერ, ასევე ცალკეულ შემთხვევებში ამომრჩევლების კეთილგანწყობის მოპოვებას სურსათის დარიგებით ნაციონალური მოძრაობის წარმომადგენლებიც ცდილობდნენ.

ამომრჩევლის მოსყიდვასთან ერთად, ISFED-ში ამბობენ, რომ ადმინისტრაციული რესურსის გამოყენება შეინიშნება სახელმწიფო და ადგილობრივი ბიუჯეტით დაფინანსებულ ღონისძიებებზე. მიუხედავად იმისა, რომ ოფიციალურად წინასაარჩევნო კამპანია 1 სექტემბერს დაიწყო და ამ პერიოდამდე განხორციელებულ აქტივობებზე ადმინისტრაციული რესურსის გამოყენებასთან დაკავშირებული შეზღუდვები არ მოქმედებდა, ორგანიზაციაში აღნიშნავენ, რომ ეს წინასაარჩევნო გარემოზე ნეგატიურად აისახება.

ამასთან, არასამთავრობო ორგანიზაცია ყურადღებას ამახვილებს დაანონსებულ პროექტებზე, რომლებიც ქმნის განცდას, რომ ეს ინიციატივები არჩევნებს უკავშირდება და ამომრჩევლის გულის მოგებას ისახავს მიზნად.

"ჩნდება განცდა, რომ მმართველი პარტია ქართული ოცნება ცდილობს, საარჩევნო მიზნით, გამოიყენოს ყველა სახის ადმინისტრაციული რესურსი, რომელზეც ხელი მიუწვდება. შესაბამისად, რიგი საჯარო ინსტიტუტები, სოციალურ-ეკონომიკური პოლიტიკის პრიორიტეტების განხორციელების ნაცვლად, საარჩევნო ხმების მიღებასა და კონკურენტ პარტიებთან შედარებით მმართველი პარტიის უპირატეს მდგომარეობაში ჩაყენებაზეა ორიენტირებული", — აღნიშნულია მონიტორინგის ანგარიშში.

ISFED ყურადღებას ამახვილებს მმართველი პარტიის ღონისძიებებზე მართლმადიდებელი ეკლესიის მაღალი სასულიერო იერარქების დასწრებაზე, რაც ეკლესიის მიერ მხარდაჭერის განცდას ქმნის.

როგორც ორგანიზაციაში აცხადებენ, საანგარიშო პერიოდში ოპოზიციური პარტიის აქტივისტის მიმართ, სავარაუდოდ, პოლიტიკური ნიშნით ფიზიკური ანგარიშსწორების შემთხვევა დაფიქსირდა. ამასთანავე, გაზრდილია, სავარაუდოდ, პოლიტიკური ნიშნით ზეწოლა-მუქარისა და სამსახურიდან გათავისუფლების შემთხვევები:

"ზეწოლისა და მუქარის ფაქტები, ძირითადად, დაფიქსირდა ოპოზიციური პოლიტიკური პარტიების აქტივისტებისა და მხარდამჭერების მიმართ, ხოლო, ერთ შემთხვევაში, მმართველი პარტიის მხარდამჭერი მუქარაში ერთიან ნაციონალურ მოძრაობას ადანაშაულებს".

ანგარიშში, ასევე, აღნიშნულია, სიძულვილის შემცველ რიტორიკაზე, რომელიც ქართული მარშისა და პატრიოტთა ალიანსის კამპანიაში შეინიშნება.