პარტია მოქალაქის ლიდერი და საბურთალოს მაჟორიტარობის კანდიდატი ალეკო ელისაშვილი აცხადებს, რომ მიხეილ სააკაშვილის, გიორგი ვაშაძის ან გიგა ბოკერიას პრემიერმინისტრობის კანდიდატურებს მხარს არ დაუჭერს. მისი თქმით, შესაძლოა, ნაციონალური მოძრაობიდან, პრემიერმინისტრის კანდიდატად სხვას დაუჭიროს მხარი, მაგალითად, ხატია დეკანოიძეს.

"არ მჯერა მაგ ბოდიშის [სააკაშვილის ბოდიში]. შეიძლება, სხვა კანდიდატს დავუჭიროთ მხარი, შესაძლოა, ხატია დეკანოიძეს. ბოკერიას, ვაშაძეს, რომელიც ოსტავ ბენდერია, არ დავუჭერთ მხარეს. ასევე, მეორე კითხვა იქნება, ვინ იქნება შინაგან საქმეთა მინისტრი. თუ გვითხრეს, რომ ვანო მერაბიშვილიო, რა თქმა უნდა, მხარს არ დავუჭერთ, ან ზურაბ ადეიშვილი, ან ა.შ." — განაცხადა მან პალიტრა ნიუსის ეთერში.

რაც შეეხება კოალიციური მთავრობის შექმნას, ელისაშვილი ამბობს, რომ თუ მისი პარტიის ხმები გადამწყვეტი იქნება, "შესაბამის ფასსაც დაადებს".

ამ ეტაპზე პრემიერობის ერთადერთი კანდიდატია ცნობილი და ეს გიორგი ვაშაძეა. სტრატეგია აღმაშენებლის იდეას არ იზიარებენ ნაციონალურ მოძრაობაში, რაც დაპირისპირების მიზეზიც გახდა. პარტიაში ფიქრობენ, რომ პრემიერმინისტრობის კანდიდატი ექსპრეზიდენტი მიხეილ სააკაშვილი უნდა იყო. ამ ეტაპზე ენმ-ს სააკაშვილის კანდიდატურა ოფიციალურად არ წარუდგენია.