სტრატეგია აღმაშენებლის ერთ-ერთი ლიდერი სერგო ჩიხლაძე დღეს პარლამენტში გედევან ფოფხაძის სიტყვის გამოსვლას ეხმაურება. როგორც ჩიხლაძე აცხადებს, ფოფხაძის დღევანდელმა გამოსვლამ ნათლად აჩვენა, თუ რა ხერხებს მიმართავდა ქართული ოცნება წინა არჩევნებში სასურველი შედეგის მისაღებად.

"გედევან ფოფხაძის განცხადება კიდევ ერთხელ მეტყველებს, რომ ჯერ კიდევ 2014 წელს, თუ როგორ სადამსჯელო მეთოდებს მიმართავდა არჩევნებისთვის დამსხვრეული ოცნებების პარტია. სუს-ის მხრიდან დაშინება, პოლიტიკური ზეწოლა და მუქარა ხორციელდებოდა ამომრჩეველზე. უშიშროების სპეც სამსახურები მაშინაც კი, როდესაც ქართულ ოცნებას ამომრჩევლის მხრიდან ნდობა და მაღალი მხარდაჭერა ჰქონდა, აღნიშნულ ქმედებებსა და მეთოდებს იყენებდა.

ახლა მითუმეტეს კიდევ უფრო "დახვეწეს" და უფრო გაამძაფრეს ეს ზემოქმედება. სწორედ ამიტომ არის საჭირო, რომ 2020 წლის 31 ოქტომბერს ხალხმა გააკეთოს სწორი არჩევანი და ეს მუქარა, დაშინება, პოლიტიკური ზეწოლა, სუს-ისა თუ პოლიციის მხრიდან ერთხელ და სამუდამოდ დასრულდეს ქვეყანაში. უნდა დავიწყოთ აღმშენებლობა და ქვეყნის განვითარება" , — განაცხადა სერგო ჩიხლაძემ.

პარლამენტში სიტყვით გამოსვლისას ქართული ოცნების ყოფილმა და ამჟამად დამოუკიდებელმა დეპუტატმა, გედევან ფოფხაძემ განაცხდა, რომ 2014 წელს ადგილობრივ არჩევნებზე საინიციატივო ჯგუფებით 42 ნომერს აინიცირებდნენ, რომლებსაც უშიშროება ეხმარებოდა კოალიციის სხვა წევრების წინააღმდეგ. მისივე თქმით, 2016 წელს ბევრი მაჟორიტარის წინააღმდეგ, რომლებიც ქართული ოცნების ან კოალიციისთვის არ იყო მისაღები, იმუშავეს უშიშროების სამსახურებმა.