ქართული ოცნება გამოდის ინიციატივით, საარჩევნო კოდექსში შევიდეს ცვლილება, რომლის თანახმადაც, მკაცრი სანქციები განისაზღვრება იძულების, დაშინებისა და ხმის მიცემის ფარულობის დარღვევის შემთხვევებზე. მმართველი გუნდის ლიდერისა და პარლამენტის თავმჯდომარის, არჩილ თალაკვაძის განცხადებით, საკანონმდებლო ცვლილებებს პარლამენტში დღეს დაარეგისტრირებენ და სექტემბერში რეგლამენტით გათვალისწინებულ სესიებზე განიხილავენ.

მისივე განმარტებით, საარჩევნო კოდექსშივე მიეთითება, რომ მსგავსი ქმედების ჩადენის შემთხვევაში პირს დაეკისრება სისხლის სამართლის პასუხისმგებლობა. ანალოგიური ცვლილება შევა სისხლის სამართლის კოდექსში.

"ხმის მიცემის ფარულობის დარღვევის მიზნით, ამომრჩევლის დაშინება ან იძულება ჩადენილი სხვადასხვა ფორმით, გამოიწვევს ჯარიმას ან შინაპატიმრობას, ვადით, ექვსი თვიდან ორ წლამდე, ან/და თავისუფლების აღვკეთას სამ წლამდე", — განაცხადა მან.

თალაკვაძის მტკიცებით, მათი მიზანია 2020 წლის საპარლამენტო არჩევნები ჩატარდეს უმაღლესი დემოკრატიული სტანდარტით და ისინი პატივს ცემენ და ენდობიან საზოგადოების თავისუფალ არჩევანს.

კითხვაზე, არის თუ არა დაკავშირებული ეს ცვლილებები ეუთო-ოდირის რეკომენდაციებთან, რომლებიც აქამდე "გამორჩათ" და ახლა ჩაამატეს, თალაკვაძე პასუხობს:

"პრაქტიკულად ყველა ის რეკომენდაცია, რომელზეც კონსენსუსი იყო პოლიტიკურ სამუშაო ჯგუფში, ავსახეთ კანონმდებლობაში. ვინაიდან ჩვენი მიზანი არის, რომ 2020 წლის არჩევნები ჩატარდეს უმაღლესი დემოკრატიული ხარისხით, ჩვენ ვდგამთ კიდევ ერთ ნაბიჯს, რომ ამ მიმართულებითაც საარჩევნო კანონმდებლობა იყოს მკაფიო და უფრო მკაცრი სანქციები განისაზღვროს".