პარლამენტის თავმჯდომარის, არჩილ თალაკვაძის თქმით, მმართველი გუნდი მუშაობს, რომ რაც შეიძლება მეტი დამკვირვებელი უსაფრთხოდ ჩამოვიდეს ქვეყანაში.

მისი თქმით, პირველ რიგში, მმართველი გუნდის ინტერესია, მთელმა მსოფლიომ დაინახოს, რომ საქართველო დემოკრატიას აძლიერებს და უპრეცენდენტოდ გამჭვირვალე, სამართლიან არჩევნებს ატარებს.

"სწორედ ეს არჩევნები უნდა გახდეს უფრო სტაბილური და შედეგზე ორიენტირებული პოლიტიკური სისტემის საფუძველი - ვმუშაობთ, რომ რაც შეიძლება მეტი დამკვირვებელი უსაფრთხოდ ჩამოვიდეს ქვეყანაში - საქართველო აძლიერებს დემოკრატიას და ატარებს სამართლიან არჩევნებს არსებითად პროპორციული სისტემით - გვსურს რომ ეს ყველამ ნახოს და შეაფასოს", — ამის შესახებ საქართველოს პარლამენტის თავმჯდომარემ გარდაბანში განაცხადა, სადაც ქართულმა ოცნებამ მოსახლეობას მაჟორიტარი დეპუტატობის კანდიდატი, ზაურ დარგალი წარუდგინა.

ევროპული საქართველოს საარჩევნო შტაბის ხელმძღვანელმა, სერგი კაპანაძემ, დღეს განაცხადა, რომ მათი ინფორმაციით, მთავრობას სურს, დამკვირვებლების რაოდენობა 2020 წლის საპარლამეტნო არჩევნებზე იყოს მცირე. კაპანაძის თქმით, საერთაშორისო დამკვირებლების ჩართულობა უმნიშვნელოვანესია, რათა არჩევნები იყოს აღქმული, როგორც თავისუფალი და სამართლიანი, ამიტომ მთავრობას მოუწოდებს, გადადგან შესაბამისი ნაბიჯები.