აჭარის ჯანდაცვის მინისტრმა, ნინო ნიჟარაძემ, განაცხადა, რომ ბათუმსა და ქობულეთში ინტენსიური PCR ტესტირება 17:00-დან დაიწყება. მინისტრის განცხადებით, საკოორდინაციო საბჭოს გადაწყვეტილებით, ქალაქ ბათუმში და ქობულეთის მუნიციპალიტეტში გადაწყდა კარვების გაშლა, სადაც მოსახლეობას ექნება შესაძლებლობა ჩაიტაროს უფასო PCR დიაგნოსტიკა.

ის მიიჩნევს, რომ ამ გადაწყვეტილებას ძალიან დიდი მნიშვნელობა აქვს, ვინაიდან აქამდე დიაგნოსტიკა ხდებოდა მხოლოდ გაფართოებულ მიზნობრივ ჯგუფებში, ცხელებისა და სხვა სიმპტომების მქონე პაციენტებში, თუმცა, ვინაიდან დაფიქსირდა ერთეული შემთხვევა, სადაც ვერ ხდება ინფექციის წყაროს იდენტიფიცირება, საჭიროდ მიიჩნიეს გაფართოებული ტესტირების ჩატარება, რომელიც იქნება უფასო მოსახლეობისათვის.

"ქალაქ ბათუმში, სანაპიროზე, ბულვარის ტერიტორიაზე, კოლონადებთან და აჭარული სახლის მიმდებარე ტერიტორიაზე, სანაპიროს მხრიდან გაიშლება ორი კარავი დღეს, დღის მეორე ნახევარში, აგრეთვე, ქობულეთის მუნიციპალიტეტში, აღმშენებლის ქუჩის მიმდებარე პარკის ტერიტორიაზე, აქაც გაიშლება კარავი. სამივე ლოკაციაზე ყოველდღიურად ტესტირების ჩატარებისთვის ნიმუშს აღება ნებისმიერ მსურველს შეეძლება. სავარაუდოდ, 17 საათიდან, როდესაც მოქალაქეების მიმოსვლა არის უფრო ინტენსიური და საღამოს, სავარაუდოდ, 22 საათამდე, თუმცა ეს დროები შეიძლება შეიცვალოს და დამოკიდებული იქნება ხალხის ნაკადზე. სანამ გვექნება ინტენსიური ტურისტული სეზონი, ამ დიაგნოსტიკას გავაგრძელებთ", — განაცხადა ნიჟარაძემ.

მისივე თქმით, ნიმუშის ჩაბარება ნებისმიერ პირს შეუძლია, რის შემდეგაც ჩაიწერება მისი საკონტაქტო ინფორმაცია და როდესაც პასუხი ცნობილი იქნება, უახლოესი 24 საათის განმავლობაში მას დაუკავშირდებიან და აღნიშნულ შედეგს აცნობებენ.