სულ მალე მაყურებელს შესაძლებლობა ექნება, ცნობილი რეჟისორის სოფია კოპოლასა და ყველასათვის საყვარელი მსახიობის ბილ მიურეის კიდევ ერთი კოლაბორაცია შეაფასოს.

ახალი ფილმის სახელწოდებაა On the Rocks და ის მამა-შვილის ურთიერთობაზე მოგვითხრობს: მამის როლს 69 წლის ბილ მიურეი ასრულებს, მისი შვილის როლი კი რაშიდა ჯონსმა მოირგო, რომელსაც მაყურებელი ისეთი გახმაურებული სატელევიზიო შოუებიდან იცნობს, როგორებიცაა Parks and Recreation და The Office.

როგორც ცნობილია, ეს კომედიური ჟანრის კინოსურათი, რომელიც თაობათა შორის დაპირისპირებაზე მოგვითხრობს, სოფია კოპოლას მიერ "ნიუ-იორკისთვის ახსნილი სიყვარულია".

ამ წლის ერთ-ერთი ყველაზე მაღალი მოლოდინების მქონე ფილმის პირველი ტრეილერი რამდენიმე საათის წინ გამოქვეყნდა:

ბილ მიურეისა და სოფია კოპოლას პირველი თანამშრომლობა ყველას ახსოვს 2003 წელს გამოსული ფილმით Lost in Translation, რომელმაც იმ წელს ოსკარების დაჯილდოებაზე საუკეთესო სცენარის ნომინაციაში გაიმარჯვა, ბილ მიურეი კი კაცის საუკეთესო როლის კატეგორიაში წარადგინეს.

მათი ახალი საერთო პროექტის შესახებ კი რამდენიმე თვის წინ თავად კოპოლამ ისაუბრა:

"ფილმი მთლიანად ბილ მიურეისა და რაშიდა ჯონსის პერსონაჟების შესახებ იქნება — ისინი მამა-შვილის როლს ასრულებენ. რაშიდას პერსონაჟი წარმატებულ ბიზნესმენზეა დაქორწინებული, რომელიც ბევრს მოგზაურობს და მომხიბვლელი ასისტენტი ჰყავს, ამის გამო კი ცოლი ეჭვიანობს. მამას კი, რომელიც ცნობილი მექალთანეა, პარანოიდული აზრები აწუხებს. ეს ფილმი ორ თაობას შორის არსებული განხეთქილების შესახებ მოგვითხრობს — შვილი ახალგაზრდა ქალია, მამა კი სულ სხვა თაობის კაცი. მათ შორის არსებული უთანხმოება კი გვაჩვენებს, თუ როგორ მოქმედებს პირადი რომანტიკული ურთიერთობები მშობლებთან ურთიერთობაზე და პირიქით", — განაცხადა კოპოლამ.

ეს ახალი ფილმი სოფია კოპოლამ კინოსტუდია A24-თან და სტრიმინგ სერვისთან Apple TV+ თანამშრომლობით გადაიღო: სხვა ბევრი ცნობილი კინორეჟისორის მსგავსად ისიც შეურთდა იმ ცნობილ ხელოვანთა რიგებს, რომლებიც კინოთეატრებთან ერთად სტრიმინგ სერვისების პლატფორმასაც იყენებენ.

IndieWire-ის ცნობით, ჯერჯერობით On the Rocks-ის პრემიერის ზუსტი თარიღი უცნობია, თუმცა მის ხილვას მაყურებელი წესით ჯერ კინოთეატრებში შეძლებს, ოქტომბერში კი სტრიმინგ სერვისზე Apple TV+ გამოჩნდება.