2020 წელს დაგეგმილ კინოპრემიერებს შორის კრიტიკოსები და მაყურებლები განსაკუთრებულად ელიან სოფია კოპოლას ახალ ნამუშევარს On the Rocks.

ეს ფილმი საინტერესოა იმითაც, რომ მასში ვიხილავთ ყველასთვის საყვარელ მსახიობ ბილ მიურეის და ამ ცნობილი მსახიობის კოპოლასთან კიდევ ერთ კოლაბორაციას შევაფასებთ.

ბილ მიურეი სოფია კოპოლას ფილმში პირველად 2003 წელს გამოსულ Lost in Translation-ში ვიხილეთ, რომელმაც იმ წელს ოსკარების დაჯილდოებაზე საუკეთესო სცენარის ნომინაციაში გაიმარჯვა, ბილ მიურეი კი კაცის საუკეთესო როლის კატეგორიაში წარადგინეს.

On the Rocks-ში მიურეი კვლავ მთავარ როლს მოირგებს, მას კი პარტნიორობას მსახიობი რაშიდა ჯონსი გაუწევს, რომელიც აქამდე ისეთი პროექტებდან ახსოვს მაყურებელს, როგორებიცაა Parks and Recreation და The Office.

აქამდე ფილმის შესახებ სხვა ინფორმაცია უცნობი იყო, თუმცა რეჟისორმა ცოტა ხნის წინ რამდენიმე დეტალი გაამხილა:

"ეს მთლიანად ბილ მიურეისა და რაშიდა ჯონსის პერსონაჟების შესახებ იქნება — ისინი მამა-შვილის როლს ასრულებენ. რაშიდას პერსონაჟი წარმატებულ ბიზნესმენზეა დაქორწინებული, რომელიც ბევრს მოგზაურობს და მომხიბვლელი ასისტენტი ჰყავს, ამის გამო კი ცოლი ეჭვიანობს. მამას კი, რომელიც ცნობილი მექალთანეა, პარანოიდული აზრები აწუხებს. ეს ფილმი ორ თაობას შორის არსებული განხეთქილების შესახებ მოგვითხრობს — შვილი ახალგაზრდა ქალია, მამა კი სულ სხვა თაობის კაცი. მათ შორის არსებული უთანხმოება კი გვაჩვენებს, თუ როგორ მოქმედებს პირადი ურთიერთობები მშობლებთან ურთიერთობაზე და პირიქით", — განაცხადა კოპოლამ.

ამ ახალ ფილმს სოფია კოპოლა კინოსტუდია A24-თან და სტრიმინგ სერვისთან Apple TV+ თანამშრომლობით იღებს. მისი პრემიერა წესით წლის ბოლომდე უნდა შედგეს, თუმცა შექმნილი მდგომარეობის გამო, უცნობია, შევძლებთ თუ არა მის ხილვას კინოთეატრებში.

არსებობს იმის ალტერნატივაც, რომ ფილმი პირდაპირ Apple-ის სტრიმინგ სერვისზე გამოვიდეს, თანაც კოპოლა ბევრი სხვა რეჟისორისგან განსხვავებით მსგავსი პლატფორმებისა და შესაძლებლობის მიმართ განსაკუთრებულად კრიტიკული არ არის:

"ვფიქრობ, სტრიმინგ სერვისები საინტერესოა თუნდაც იმის გამო, რომ შეგიძლია სხვადასხვა ფორმატის ფილმზე იმუშავო და მაინცდამაინც 90-წუთიან ქრონომეტრაჟში ჩატევას არ ეცადო. მიუხედავად იმისა, რომ ეს მომწონს, ამავდროულად მას, როგორც ტრადიციულ კინოს ვერ ვუკავშირებ. ეს რაღაც უფრო განსხვავებულია, რაც მგონია, რომ საინტერესოა", — ამბობს რეჟისორი.

სოფია კოპოლას წინა სრულმეტრაჟიანი ფილმი 2017 წელს გამოსული The Beguiled-ია, რომლის გამოც მას კანის საერთაშორისო კინოფესტივალზე საუკეთესო რეჟისორის ჯილდო გადასცეს.