საქართველოს პროკურატურის ინფორმაციით, საქართველოში მცხოვრები ნიგერიის სამი მოქალაქე ამერიკის შეერთებული შტატების მოქალაქის კუთვნილ, დიდი ოდენობით თანხას თაღლითურად დაეუფლა. ამასთან, მათ ედავებიან უკანონო შემოსავლის ლეგალიზაციასაც.

გამოძიების ინფორმაციით, ბრალდებულებმა წინასწარ შემუშავებული გეგმის შესაბამისად, სოციალურ ქსელში, გამოგონილი პიროვნების სახელით დაარეგისტრირეს მომხმარებლის გვერდი და კომუნიკაცია დაამყარეს დაზარალებულთან — ამერიკის შეერთებული შტატების მოქალაქე დ.კ-სთან. უწყების თქმით, მათ დაზარალებული დაარწმუნეს, რომ ეკონტაქტებოდა ვითომდა საქართველოში მცხოვრები, წარმოშობით გერმანელი ფრენკ ლუკას ბალაკი, რომელსაც მოგებული ქონდა 900 000 აშშ დოლარის ღირებულების ტენდერი ხიდების მშენებლობასთან დაკავშირებით და უახლოეს მომავალში აპირებდა მასთან, აშშ-ში ჩასვლას, ოჯახის შექმნის მიზნით.

"ნდობის მოპოვების შემდეგ, დანაშაულებრივი ჯგუფის წევრები, გამოგონილი ქართველი ექიმის სახელით, დაუკავშირდნენ დაზარალებულს და აცნობეს, რომ ფრენკ ლუკას ბალაკი მოყვა ავარიაში და სასწრაფოდ ესაჭიროებოდა თანხის გაგზავნა საქართველოში მკურნალობის ხარჯების დასაფარად. ამავდროულად დაარწმუნეს, რომ მკურნალობის მიზნით საქართველოში გადმორიცხული ფულადი თანხები აუნაზღაურდებოდა ხიდების მშენებლობასთან დაკავშირებული ტენდერიდან მიღებული შემოსავლებიდან", — აცხადებენ პროკურატურაში.

მათივე ინფორმაციით, აშშ-ს მოქალაქემ ეს ინფორმაცია რეალურად აღიქვა და მათ ეტაპობრივად, ჯამში 233 250 აშშ დოლარი გადაურიცხა. პროკურატურა ამბობს, რომ ბრალდებულებმა ამ თანხისთვისთვის კანონიერი სახის მიცემის და ლეგალიზაციის მიზნით, ფული დაანაწევრეს და მრავალჯერადი ტრანზაქციებით, სწრაფი ფულადი გზავნილების სახით, გადარიცხეს ნიგერიის და თურქეთის რესპუბლიკებში, მათ მიერ კონტროლირებად საბანკო ანგარიშებზე. უწყების ცნობით, მათ ჯამში 86 800 აშშ დოლარის უკანონო შემოსავლის ლეგალიზაცია მოახდინეს.

პროკურატურაში ამბობენ, რომ ნიგერიის სამ მოქალაქეს 13 აგვისტოს ბრალი საქართველოს სისხლის სამართლის კოდექსის 180-ე მუხლის მეორე ნაწილის "ა" და მესამე ნაწილის მესამე ნაწილის "ბ" ქვეპუნქტებით, ასევე 194-ე მუხლის მეორე ნაწილის "ა" და მესამე ნაწილის "გ" ქვეპუნქტებით წარუდგინეს, რაც თაღლითობას და უკანონო შემოსავლის ლეგალიზაციას გულისხმობს. დანაშაული 9-დან 12 წლამდე ვადით თავისუფლების აღკვეთას ითვალისწინებს.

პროკურატურის ინფორმაციითვე, 2020 წლის 14 აგვისტოს ბრალდებულებს აღკვეთის ღონისძიების სახით პატიმრობა შეეფარდათ.