მსოფლიოში ცნობილი მსახიობი და სატელევიზიო სახე ოპრა უინფრი გასულ მარტს პოლიციელების სროლის შედეგად კენტუკის შტატში მოკლული 26 წლის აფროამერიკელი ბრეონა ტეილორის საქმეზე სამართლიანობის აღდგენის მოთხოვნით ყველა შესაძლო ხერხს მიმართავს.

კენტუკის შტატ ქალაქ ლუისვილში, სადაც დაღუპული ტეილორი ცხოვრობდა, ბილბორდები გამოჩნდა, რომლითაც იმ პოლიცილების დასჯას მოითხოვენ, რომლებიც ბრეონა ტეილორის მკვლელობაში არიან გარეული.

ლუისვილის ირგვლივ ამ მოთხოვნით სულ 26 ბილბორდი გამოჩნდა — დაღუპული ბრეონა ტეილორის ასაკის მსგავსად.

CNN-ის ინფორმაციით, ბრეონა ტეილორი, რომელიც სასწრაფო დახმარების ბრიგადის წევრი იყო, პოლიციამ რამდენიმე გასროლით მის სახლში შეჭრისას მოკლა.

ფოტო: lan T. Lovan / AP

ბილბორდები ოპრა უინფრის აქტიური პოლიტიკის ნაწილია, რომლითაც რასობრივი ნიშნით შესაძლო დანაშაულებების სამართლიან და გამჭირვალე გამოძიებას ბოლო კვირების განმავლობაში აქტიურად მოითხოვს.

ბილბორდების გამოჩენამდე 30 ივლისს ოპრა უინფრიმ თავისი ცნობილი ყოველთვიური ჟურნალის O, The Oprah Magazine ყდა გამოაქვეყნა, რომელზეც ბრეონა ტეილორის ილუსტრაციაა გამოსახული. ეს პირველი შემთხვევაა, როცა ოცწლიანი ისტორიის მქონე ამ ჟურნალის ყდაზე ოპრა არ არის გამოსახული და ის მთლიანად სხვა პიროვნებას ეთმობა.

ჟურნალი სექტემბერში გამოიცემა და ბილბორდებზე გამოქვეყნებული განცხადებაც სწორედ ამ კამპანიის ნაწილია.

"სამართლიანობის აღდგენის მოთხოვნით ყველა შესაძლო საშუალება უნდა გამოვიყენოთ. სწორედ ამიტომაცა ბრეონა ტეილორი O, The Oprah Magazine-ის ყდაზე გამოსახული. მე მოვითხოვ მისი მკვლელობის გამო სამართლიანობის აღდგენას. ჟურნალის სექტემბრის ნომერი მას და ყველა იმ შავკანიან ქალს მიაგებს პატივს, რომელთა სიცოცხლეც მეტისმეტად ნაადრევად დასრულდა", — განაცხადა ოპრა უინფრიმ.

25 მაისს დაკავებისას აშშ-ის კიდევ ერთი აფროამერიკელი მოქალაქის, ჯორჯ ფლოიდის გარდაცვალების შემდეგ როგორც ამერიკაში, ისე მსოფლიოს სხვადასხვა წერტილში ანტირასისტული საპროტესტო აქციები გაიმართა. აშშ-ში აქციის მონაწილეები პოლიციელების მიერ მოკლული შავკანიანი მოქალაქეების საქმეების გამოძიებას და შესაძლო დამნაშავეების დასჯას ითხოვენ. მათ შორის ერთ-ერთი ყველაზე გახმაურებული შემთხვევა სწორედ ბრეონა ტეილორის გარდაცვალებაა.