"კონკრეტულ შემთხვევებში სხვადასხვა მოტივი არსებობსს", — ასე უპასუხა პრემიერმინისტრმა, გიორგი გახარიამ კონგრესმენების კრიტიკულ წერილზე დასმულ კითხვას. კონგრესმენებმა წერილში საქართველოში დემოკრატიული მმართველობის გაუარესებაზე ისაუბრეს და ბიძინა ივანიშვილს რუს ოლიგარქად მოიხსენიეს.

გახარიას თქმით, ამერიკული პოლიტიკური სპექტრი სხვადასხვანაირია და "ზოგი კონგრესმენი შეგვაქებს, ზოგი გაგვაკრიტიკებს".

"მთვარი არის, რომ ორ ქვეყანას შორის სტრატეგიულ ურთიერთობებს არაფერი არ ემუქრება, ისევე, როგორც ამერიკული ბიზნესის ინტერესებს საქართველოში არაფერი არ ემუქრება. მაგრამ, როდესაც ადამიანები, მათ შორის ამერიკელები, საინვესტიციო თუ სხვა სახის ვალდებულებებს ვერ ასრულებენ და საქართველო არბიტრაჟს იგებს, ეს უნდა გვიხაროდეს", — განაცხდა მან.

მანამდე ამ კითხვას გახარიამ არ უპასუხა და განაცხადა, რომ მისთვის ახლა მოქალაქეები უფრო მნიშვნელოვანი არიან, ვიდრე კონგრესმენები, "სადაურებიც არ უნდა იყვნენ".

გახარიამ კონგრესმენების წერილზე საუბრისას აღნიშნა ისიც, რომ მაიკლ პოპმეოსთან სატელეფონო საუბარი პოზიტიური და მომავალზე ორიენტირებული იყო. მისი თქმით, ობიექტური რეალობაა ის, რომ აშშ-სა და საქართველოს ისტორიის განმავლობაში ყველაზე ახლო სტრატეგიული პარტნიორობა აქვთ.

მისივე თქმით, "გამოგონილი შეკითხვებით" არ უნდა შევუქმნათ საფრთხე ქართულ-ამერიკულ ურთიერთობებს:

"რატო არ უნდა შევუქმნათ იცით? ეს ქვეყანა ჯერ კიდევ ოკუპირებულია და ჩვენ ჩვენი სტრატეგიული პარტნიორების მხარდაჭერის გარდა ამ ოკუპაციის მშვიდობიანი გზით გადაწყვეტის სხვა გზა არ გვაქვს. ეს ყველას კარგად უნდა გვესმოდეს. როდესაც მოკლევადიანი, საარჩევნო პოლიტიკური კონიუქტივიდან რაღაც უაზრო კითხვებს სვამთ, უნდა ვიცოდეთ, რომ ამის ხშირ შემთხვევაში შეიძლება ქვეყანა დავაზიანოთ", — განაცხადა გახარიამ.

კონგრესმენები წერენ, რომ ხელისუფლებაში "რუსი ოლიგაქრი ივანიშვილისა" და მისი პარტიის მოსვლის შემდეგ, საქართველო პროგრესს ჩამორჩა.

ამავე წერილში, კონგრესმენები მიმართავენ მაიკ პომპეოს შემდეგ საკითხებზე გაამახვილოს ყურადღება:

  1. "საქართველოს ახლანდელი მთავრობა, რომელსაც უძღვება ქართული ოცნება, არის რუსი ოლიგარქის, ბიძინა ივანიშვილის მანიპულაციის ქვეშ, რომელიც ყველაფერს აკეთებს იმისათვის, რომ ამერიკული ბიზნესები, რომლებიც ათწლეულია ამერიკულ და ქართულ ეკონომიკაში კონტრიბუციას დებენ, ქვეყნიდან გააძევოს. ეს ხდება რუსეთიდან ჩინეთიდან და ირანიდან შემოსული მზარდი კერძო სექტორის სასიკეთოდ;
  2. საქართველოში შავი ზღვის პორტებთან დაკავშირებული აქტივობები საფრთხეს უქმნის ამერიკის ეროვნული უსაფრთხოების კრიტიკულად მნიშვნელოვან ინტერესებს, მათ შორის: ა) შავი ზღვის პორტებიდან ამერიკული კომპანიების ინვესტიციების/მფლობელობის გამოდევნა, მაშინ როცა ამ უკანასკნელების მიზანი საქართველოს ჩინეთისა და რუსეთის გავლენებისგან დაცვა იყო; ბ) ირანისა და რუსეთის წინააღმდეგ დაკისრებული სანქციების არასაკმარისად შესრულება, განსაკუთრებით და კონკრეტულად იმ კონტექსტში, როცა საქმე ეხება საზღვაო პორტის აქტივობებსა და მასთან დაკავშირებული კერძო სექტორის ინვესტიციებს.
  3. ის ფაქტი, რომ საქართველოს პარლამენტს ჯერ კიდევ არ მიუღია აუცილებელი საარჩევნო რეფორმის კანონი, რომელიც გადამწყვეტია 2020 წლის შემოდგომის საპარლამენტო არჩვენების გამჭვირვალედ და სამართლიანად ჩატარებისთვის".

ეს პირველი შემთხვევა არ არის, როდესაც კონგრესმენები ქართული ოცნების ხელისუფლებასა და მათ ლიდერს, ბიძინა ივანიშვილს აკრიტიკებენ. კრიტიკის პასუხად მმართველ გუნდში აცხადებენ, რომ ქართულ-ამერიკული ურთიერთობები განვითარების უმაღლეს ეტაპზეა და ქვეყანას აშშ-ის ხელისუფლების სრული მხარდაჭერა აქვს. "ოცნების" დეპუტატების ნაწილი ამბობს იმასაც, რომ ზოგიერთი კონგრესმენი მიკერძოებულია და სხვადასხვა კომპანიის, მათ შორის ფრონტერას ინტერესებს ატარებს.