რამდენიმეთვიანი ურთიერთბრალდებების შემდეგ, სახელმწიფო და კომპანია ფრონტერა გამოთქვამენ მზაობას, ორმხრივი შეთანხმების საფუძველზე საერთაშორისო არბიტრაჟის გადაწყვეტილება გასაჯაროვდეს. ფრონტერა რისორს ჯორჯიას პრეზიდენტის, ზაზა მამულაიშვილის განცხადებით, სახელმწიფოს 2 ვერსიას სთავაზობენ, რომელთაგან ერთი იურიდიული ფორმალობების გამო 2 კვირა გაიწელება, მეორე კი გადაწყვეტილების დღესვე გასაჯაროების საშუალებას იძლევა.

მამულაიშვილი On.ge-სთან საუბარში განმარტავს, რომ არბიტრაჟის დასკვნაში არის არაერთი კომერციული, გეოლოგიური, ტექნიკური და პირადი ინფორმაცია, რომელიც კონფიდენციალურია და გამოქვეყნებამდე საჭიროა ყველა დაინტერესებულ მხარესთან შეთანხმება. მისი განცხადებით, ამ გარემოებების გათვალისწინებით, იურიდიული ფორმალობების მოგვარებას 2 კვირა დასჭირდება და ამის შემდეგ შეძლებენ გასაჯაროებას. რაც შეეხება მეორე ვერსიას, მამულაიშივლის თქმით, შეუძლიათ ნავთობისა და გაზის სააგენტოს წარმომადგენელთან ერთად, ტელევიზიების წინ ჩაიკითხონ გადაწყვეტილების ტექსტი და ამ ფორმით გაასაჯაროონ. მისივე თქმით, ამას სახელმწიფოს პირველივე დღიდან სთავაზობენ, თუმცა უარს იღებდნენ.

ფრონტერას მზაობას გამოეხმაურა ნავთობისა და გაზის სააგენტოც და ფრონტერას ხელმძღვანელობა შეხვედრაზე მიიწვია, რომ პირობები და ვადები საქმიან ვითარებაში განიხილონ.

"სააგენტო მიესალმება იმ ფაქტს, რომ ჩვენი არაერთი შეთავაზების შემდეგ, კომპანიამ საბოლოოდ მიიღო ეს გადაწყვეტილება და ოფიციალურად იწვევს შეხვედრაზე მის ხელმძღვანელობას, რათა უახლოეს დღეებში, საქმიან ვითარებაში განვიხილოთ როგორც გადაწყვეტილების ერთობლივად გასაჯაროების პირობები და ვადები, ასევე, მათ მიერ არბიტრაჟის გადაწყვეტილების ნებაყოფლობითი აღსრულების ფარგლებში დაბრუნებულ ტერიტორიებთან დაკავშირებული ქონებრივი და სხვა პროცედურული საკითხები, აგრეთვე მათ სარგებლობაში დარჩენილ ტერიტორიაზე არსებული მდგომარეობა და მუშა-მოსამსახურეებისთვის არსებული დავალიანების დაფარვის ვადები",— წერია სააგენტოს განცხადებაში.

კომპანია ფრონტერასა და სახელმწიფოს შორის დავა რამდენიმე წელია გრძელდება და ამ პერიოდის განმავლობაში მხარეებმა არაერთხელ შეიცვალეს პოზიცია სამომავლო თანამშრომლობასთან დაკავშირებით. სახელმწიფომ ფრონტერასთან კონტრაქტი შეეწყვიტა მას შემდეგ, რაც საარბიტრაჟო სასამართლოში დავა დასრულდა. თუმცა, მოგვიანებით გადაიფიქრა და კომპანიას უფლება მისცა, საძიებო სისტემის დარჩენილ 1%-ზე იმუშაოს. სამინისტროში ამბობენ, რომ ეს განპირობებულია სურვილით, შეინარჩუნონ საინვესტიციო გარემოსთან დაკავშირებული საერთაშორისო რეპუტაცია და სტრატეგიულ პარტნიორებთან, კერძოდ, კონგრესმენებთან აშშ-დან ჰქონდეთ კარგი ურთიერთობა.

მხარეებს შორის ურთიერთბრალდებები საარბიტრაჟოს გადაწყვეტილებამდეც არ იყო უცხო, თუმცა შემდეგ უფრო გახშირდა. ორივე მხარე აცხადებდა, რომ გადაწყვეტილება მათ სასარგებლოდაა და ერთმანეთს ვალდებულებების შეუსრულებლობასა და ზეწოლაში ადანაშაულებდნენ.

ფრონტერას საკითხს აქტიურად ეხმაურებოდნენ ამერიკელი კონგრესმენებიც და საქართველოს მთავრობას ბიზნესზე ზეწოლაში ადანაშაულებდნენ. რაზე პასუხადაც საქართველოში ამბობდნენ, რომ კონგრესმენები დაინტერესებული მხარე არიან და ამ შემთხვევაში მათი კრიტიკა უსაფუძვლოა.