ეროვნულ-დემოკრატიული ინსტიტუტის (NDI) კვლევის თანახმად, იმ გამოკითხულთა 90 პროცენტი, რომელიც თავს ქრისტიანულ რელიგიას მიაკუთვნებს, სააღდგომო მსახურებას არ დასწრებია.

კითხვაზე, რომელ რელიგიას ან აღმსარებლობას მიაკუთვნებენ თავს, გამოკითხულთა 87 პროცენტი პასუხობს, რომ ქართულ მართლმადიდებელ ეკლესიას.

რესპონდენტებს ასევე ჰკითხეს, განსაკუთრებული ღონისძიებების გარდა, როგორებიცაა ქორწინება ან გასვენება, რამდენად ხშირად ესწრებიან რელიგიურ მსახურებას (ვინც რომელიმე რელიგიას მიაკუთვნებს თავს). პასუხები ასე გადანაწილდა:

  • 1% — ყოველდღე;
  • 4% — უფრო ხშირად, ვიდრე კვირაში ერთხელ;
  • 13% — კვირაში ერთხელ;
  • 17% — თვეში ერთხელ მაინც;
  • 25% — მხოლოდ განსაკუთრებულ რელიგიურ დღესასწაულებზე;
  • 28% — უფრო იშვიათად;
  • 11% — არასდროს.

NDI-მ კვლევისთვის სატელეფონო გამოკითხვა და ფოკუს ჯგუფების მეთოდოლოგია გამოიყენა. სატელეფონო გამოკითხვის შემთხვევაში, საველე სამუშაოები 26-30 ივნისს ჩატარდა და შედგა 1 550 დასრულებული ინტერვიუ. ორგანიზაციის ინფორმაციით, რესპონდენტები შემთხვევით ნომერზე დარეკვის მეთოდით შეირჩა და ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით). გარდა ამისა, კვლევა წარმომადგენლობითია თბილისის, ურბანული და სოფლის ტიპის დასახლებებისთვის. საშუალო ცდომილების ზღვარი +/- 2%-ია, თუმცა იცვლება სხვადასხვა კითხვის მიხედვით.

რაც შეეხება ფოკუს ჯგუფებს, საველე სამუშაოები 24-30 ივნისს, ხუთ ქალაქში ჩატარდა: თბილისი, ზუგდიდი, ბათუმი, მარნეული, ახალქალაქი. თითოეულ ქალაქში 2 ფოკუს ჯგუფი იყო: შერეული ასაკი, სქესი და დასაქმების სტატუსი. მონაწილეები შეარჩიეს ორი მეთოდით: CRRC-ის კოორდინატორები მიდიან ქალაქის რამდენიმე ცენტრალურ ადგილას, შემთხვევითად აჩერებენ ადამიანებს და ჯგუფურ დისკუსიაში მონაწილეობას სთავაზობენ და "თოვლის გუნდის" მეთოდი. ფოკუს ჯგუფში დისკუსიას პროფესიონალი მოდერატორი უძღვებოდა, ღია კითხვებით.