თეთრიწყაროს მუნიციპალიტეტის სოფელ ასურეთის მოსახლეობა უწყლობის გამო აქციას მართავს და მთავრობას დახმარებისთვის მიმართავს. "სოფელი გადამხმარია, არც დასალევი წყალი გვაქვს და არც სარწყავი", — On.ge-სთან საუბარში ჰყვება ადგილობრივი ნელი მაზანაშვილი და აღნიშნავს, რომ სოფელს მეურნეობის პერსპექტივა არ აქვს. მოსახლეობა წყალს 20 კილომეტრით დაშორებული ადგილიდან, მანქანით ეზიდება.

"ძროხა რომ არ გვყავდეს მშიერი მოვკვდები. დავთესავ, დავბარავ, ამ ხნის ქალი ვწვალობ და რომ გახდება 15 სანტიმეტრი, დააჭერს ეს მზე და ხმება. ფუჭდება ყველაფერი. ძირითადად გვყავს ძროხები. ის ორი კილო ყველი უნდა წავიღო, რომ ვიყიდო ლობიო, სიმინდი, ქინძი და ასეთი რამეები", — გვიყვება ნელი მაზანაშვილი.

იგი იხსენებს, რომ წყლის პრობლემა სოფელს 2011-2012 წლამდეც ჰქონდა და ამ პრობლემით მოვიდა ქართული ოცნების ხელისუფლება. დაპირებები მაშინაც მიიღეს და ახლაც იღებენ, თუმცა უშედეგოდ:

"34 წელიწადია წყალს ვითხოვთ, მაგრამ ბოლო 8 წელია მაგრად ვითხოვთ".

ნელი მაზანაშვილის თქმით, სოფელ ასურეთში 500-მდე კომლი და 830 ამომრჩეველი ცხოვრობს. რამდენიმე დღის წინ იქ პრემიერმინისტრი გახარია გერმანიის ელჩთან ერთად ჩავიდა. მაზანაშვილი აღნიშნავს, რომ პრემიერმა სოფლის მხოლოდ ერთი ისტორიული ქუჩა დაათვალიერა და ადგილობრივების პრობლემებზე ყურადღება არ გაუმახვილებია.

ასურეთი ძველი ქართული სოფელია. ცარისტულმა რუსეთმა მე-19 საუკუნის 20–იან წლებში იქ გერმანელი კოლონისტები ჩაასახლა და შექმნა გერმანული კოლონია, სახელად ელიზაბეტალი. ასე სოფელს ერქვა მე-20 საუკუნის 10-იან წლებამდე, შემდეგ დაუბრუნდა ძველი სახელი — ასურეთი. სოფლისთვის დამახასიათებელია გერმანული არქიტექტურა. იქ გერმანული დასახლება არსებობდა 1941 წლამდე, ვიდრე სტალინის ბრძანებით გაასახლებდნენ მათ საქართველოდან.