ადამიანის უფლებების სწავლებისა და მონიტორინგის ცენტრი (EMC) ეხმიანება ადამიანის უფლებების დაცვის საერთაშორისო დღეს და 2016 წელს ადამიანის უფლებების მდგომარეობას აჯამებს.

საარჩევნო წელი

"პოზიტიურად უნდა შეფასდეს ის, რომ წინა საპარლამენტო არჩევნებისგან განსხვავებით, მიმდინარე წინასაარჩევნო პროცესი არ ხასიათდებოდა მასობრივი და რეპრესიული საპოლიციო ძალების გამოყენებით" - აცხადებს EMC.

ორგანიზაცია მიიჩნევს, რომ მედია გარემომ უზრუნველყო განსხვავებული პოლიტიკური ჯგუფებისა და მოსაზრებების გაშუქება.

EMC ეხმაურება რუსთავი 2-ის წინააღმდეგ მიმდინარე სასამართლო დავას და აცხადებს, რომ კითხვები არსებობს პროცესის პოლიტიკური ხასიათის თაობაზე.

EMC პოზიტიურად აფასებს პარტიების შეხვედრებს მოსახლეობასთან:

"პოლიტიკური სუბიექტების მიერ ჩატარებული შეკრებები ასევე მეტწილად მშვიდ გარემოში ჩატარდა".

EMC პრობლემად აფასებს იმ საკითხს, რომ წინასაარჩევნო პერიოდში პოლიტიკურ პარტიებს შორის დებატები არ იყო ორიენტირებული ადამიანის უფლებების დაცვისთვის ეფექტიანი მოდელების ამუშავების იდეებზე:

"ამან პოლიტიკური დღის წესრიგიდან ჩაგრული სოციალური ჯგუფებისთვის სასიცოცხლოდ მნიშვნელოვანი საკითხების გატანა განაპირობა".

EMC აცხადებს, რომ სამართალდამცავი ორგანოებისა და სასამართლო სისტემის რეფორმირების მიმართულებით არსებითი და სისტემური ნაბიჯები არ გადადგმულა.

"ხელისუფლებამ არ უზრუნველყო ეფექტიანი ანტიდისკრიმინაციული პოლიტიკის განხორციელება, რამაც არსებითად დააზიანა დისკრიმინირებული ჯგუფების უფლებრივი და სოციალური მდგომარეობა. სოციალურად მოწყვლადი და ჩაგრული ჯგუფების უფლებრივი მდგომარეობის გაუმჯობესებისკენ მიმართული სახელმწიფოს მიერ განხორციელებული ღონისძიებები და არაეფექტიანი იყო".