საქართველოს პრემიერმინისტრსა და აშშ-ს სახელმწიფო მდივანს შორის სატელეფონო საუბარი შედგა. ოფიციალური ინფორმაციით, გიორგი გახარიამ და მაიკ პომპეომ ვაშინგტონში დაგეგმილი საქართველო-აშშ-ის სტრატეგიული პარტნიორობის ქარტიის პლენარული სესიის დაკავშირებით ისაუბრეს, რისი გადადების მიზეზიც კოვიდ-19 გახდა.

მთავრობის ინფორმაციით, პრემიერმინისტრმა და აშშ-ის სახელმწიფო მდივანმა ქვეყნის მთავარ გამოწვევაზე — ოკუპაციასა და ოკუპირებულ ტერიტორიებზე არსებულ მძიმე მდგომარეობაზე, რეგიონის და ზოგადად, ევროატლანტიკურ უსაფრთხოებაში შავი ზღვის უსაფრთხოების როლზე, ავღანეთში მიმდინარე ნატოს "მტკიცე მხარდაჭერის მისიაში" საქართველოს მონაწილეობასა და ოქტომბრის არჩევნებზე ისაუბრეს.

პომპეოს თქმით, მნიშვნელოვანია, რომ 2020 წლის არჩევნები იყოს თავისუფალი, სამართლიანი და გამჭვირვალე.

სატელეფონო საუბრისას პომპეომ კიდევ ერთხელ აღნიშნა, რომ მხარს უჭერს საქართველოს სუვერენიტეტსა და ტერიტორიულ მთლიანობას და რომ რუსეთმა 2008 წლის ცეცხლის შეწყვეტის შესახებ ნაკისრი ვალდებულებები უნდა შეასრულოს.