შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებლის, ლია გიგაურის განცხადებით, შესაძლოა, წითელ ჯვარს დღეს მიეცეს საოკუპაციო რეჟიმის მიერ უკანონოდ დაპატიმრებული ზაზა გახელაძის ნახვის საშუალება. მისი თქმით, გახელაძის ჯანმრთელობის მდგომარეობა დამაკმაყოფილებელია და არანაირი საფრთხე არ ემუქრება.

"მე მქონდა შეხვედრა პერსონალური წითელი ჯვრის საერთაშორისო ორგანიზაციის ხელმძღვანელთან საქართველოში, რომელმაც მითხრა, რომ ის პრობლემები, რომლებიც შეექმნა წითელ ჯვარს მონახულებზე, დაკავშირებული იყო საკარანტინო პერიოდთან სწორედ ეს მიზეზი დაუსახელეს მათ, რომ ეს პერიოდი უკვე დასრულებულია და მათ აქვთ მოლოდინი, რომ დღეს ექნებათ საშუალება მოინახულონ ზაზა გახელაძე.

რაც შეეხება მის მდგომარეობას ამაზე ინტენსიურად გვაწვდიან ინფორმაციას, რომ მისი ჯანმრთელობა დამაკმაყოფილებელია და არანაირი საფრთხე არ ემუქრება. ასევე, პირობები, რომელშიც იმყოფება არის დამაკმაყოფილებელი", — განაცხადა გიგაურმა.

მისივე თქმით, ბოლო პერიოდში 6 ადამიანი იყო გატაცებული და 3 უკვე გაათავისუფლეს აფხაზეთის ოკუპირებული ტერიტორიიდან, 3 კი ცხინვალის რეგიონში რჩება. მათ შორისაა, გახელაძეც.

"ყველა ის მექანიზმი, რომელსაც ჩვენ ვიყენებთ მიმართულია იქეთ, რომ უპირობოდ გათავისუფლდეს და ამას აქვს ძალიან დიდი მნიშვნელობა. არანაირი პროცესები არ წარიმართოს, არამედ უპირობოდ მოხდეს ზაზა გახელაძის და სხვების გათავისუფლება. ეს არის ერთადერთი პირობა. სხვა არანაირი არ არის", — განაცხადა გიგაურმა.

ოკუპანტებმა ზაზა გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. რუსული მხარის მტკიცებით, ზაზა გახელაძემ ცეცხლი პირველმა გახსნა. მათივე მტკიცებით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა.

ოკუპირებული ცხინვალის მტკიცებით, საოკუპაციო ძალების მიერ დაჭრილი და დაკავებული ზაზა გახელაძე კარანტინში გადაიყვანეს. დე ფაქტო ხელისუფლების სამხედრო პროკურორის, ტიგრან კაბულოვის თქმით, გახელაძე კარანტინში გადაიყვანეს, რათა დარწმუნდნენ, რომ კორონავირუსით ინფიცირებული არ არის.

მისივე თქმით, გახელაძის წინააღმდეგ საქმე აღძრულია სამხედრო მოსამსახურის სიცოცხლის ხელყოფისა და სახელმწიფო საზღვრის უკანონოდ გადაკვეთის მუხლით.

ქვეყანა, რომელსაც საქართველოს ტერიტორიები 2008 წლის შემდეგ ოკუპირებული აქვს, "პოლიტიკური სპექტაკლის" მოწყობაში თბილისს ადანაშაულებს. თუმცა პრობლემის მოგვარების გზად რუსეთი მხოლოდ ე.წ. საზღვრის დელიმიტაცია/დემარკაციაში ხედავს.