ქალთა ნაციონალური საკალათბურთო ასოციაციის ორი გუნდის მოთამაშეები სეზონის გამხსნელი შეხვედრის წინ ჩართული ქვეყნის ეროვნული ჰიმნის დროს მოედნიდან გავიდნენ. ამ ქმედებით მათ მოძრაობის, Black Lives Matter, მიმართ მხარდაჭერა გამოხატეს.

ფლორიდის ქალაქ ბრადენტონში გამართულ მატჩზე საკალთბურთო გუნდების, Seattle Storm-ისა და New York Liberty-ის მოთამაშეებს, ამასთან, შავი ზედებიც ეცვათ წარწერით, "თქვი მისი სახელი". ეს ფრაზა ამერიკაში მიმდინარე დემონსტრაციების ერთ-ერთი სლოგანი გახლავთ, რომელიც პოლიციელების მიერ 26 წლის შავკანიანი ქალის, ბრეონა ტეილორის მოკვლით გამოწვეულ პროტესტს გამოხატავს.

მართალია, აშშ-ის სპორტსმენებს ეროვნული ჰიმნის დროს პროტესტი აქამდეც გამოუხატავთ, თუმცა ეს პირველი შემთხვევაა, როცა ორი მოთამაშე გუნდის უკლებლივ ყველა წევრმა ერთად დატოვა სათამაშო მოედანი.

ეს აქტი ინიციატივა Justice Movement-ის ნაწილი გახლავთ, რომლის შესახებაც ქალთა ნაციონალურმა საკალათბურთო ასოციაციამ (WNBA) და ქალთა ნაციონალურმა საკალათბურთო ასოციაციის მოთამაშეებმა (WNBPA) თვის დასაწყისში განაცხადეს. მოძრაობის ორგანიზატორთა მიზანია, კოორდინირებული ნაბიჯებით იქცნენ იმ "ძალად, რომელიც რასის, არჩევნებში მონაწილეობის მიღების უფლების, LGBTQ+ თემის წევრთა მხარდაჭერის, ცეცხლსასროლი იარაღის კონტროლის და სხვა მნიშვნელოვანი სოციალური საკითხების" გადაჭრას დააჩქარებს. ამ ორ ორგანიზაციას მსგავსი აქტუალური თემებისადმი მოსახლეობის ყურადღების მიქცევა საჯარო დიალოგების, საზოგადოებრივი დისკუსიების და პოდკასტების მეშვეობითაც სურს.

იმავე მატჩის დაწყებამდე ორი გუნდის წევრებმა 26-წამიანი დუმილით მიაგეს პატივი ტეილორის ხსოვნას — სიჩუმის თითო წამი მისი ცხოვრების თითო წელს აღნიშნავდა.

"ჩვენ მიმდინარე სეზონს ვუძღვნით ბრეონა ტეილორს, სამედიცინო სფეროს გამორჩეული დამსახურებების მქონე მუშაკს, რომელიც საკუთარ სახლში 130 დღეზე მეტი ხნის წინ მოკლეს", — განაცხადა New York Liberty-ის მოთამაშემ, ლეიშია კლარენდონმა, რომელიც, ამასთან, WNBPA-ის პირველი ვიცე-პრეზიდენტი და აღნიშნული ინიციატივის ლიდერთაგანია, — "ჩვენ ვიტყვით მის სახელს".

კლარენდონმა ასევე განაცხადა, რომ ორგანიზაციები ამ სეზონს კამპანიას, "თქვი მისი სახელი", უძღვნიან, რომელიც შავკანიანი ქალებისთვის სოციალური სამართლიანობისთვის იბრძვის. მან დაასახელა სხვა მსხვერპლი შავკანიანი ქალებიც, მათ შორის სანდრა ბლენდი, რომელიც 5 წლის წინ პოლიციის განყოფილებაში ყოფნისას მოკვდა.

ამერიკაში კალათბურთელთა მხრიდან სხვადასხვა სოციალურ უსამართლობაზე პროტესტის გამოთქმას ხანგრძლივი ისტორია აქვს. მსგავს აქტებს შორის იყო NBA-ის მოთამაშეების მიერ მატჩებისთვის ბოიკოტის იმ მიზნით გამოცხადება, რომ შეწყვეტილიყო სასტუმროებში რასობრივი სეგრეგაცია და მარტინ ლუთერ კინგის მკვლელობის შემდეგ გამართული საპროტესტო მსვლელობა.

ამასთან, პრეზიდენტ ტრამპს და მისი ადმინისტრაციის სხვა მაღალჩინოსან წევრებს ეროვნული ჰიმნის დროს გამოთქმული პროტესტისთვის სპორტსმენები არაერთხელ გაუკიცხავთ.