სამხარაულის სახელობის სასამართლო ექსპერტიზის ეროვნული ბიურო გიორგი შაქარაშვილის ექსპერტიზის დასკვნაში "გვამურ გაშეშებაზე" ჩანაწერს განმარტავს.

როგორც მათ განცხადებაშია აღნიშნული, შემთხვევის ადგილის დათვალიერების ოქმში მითითებული გარემოება იმაზე, რომ შაქარაშვილის ცხედარს "გვამური გაშეშება გამოხატული ჰქონდა ყველა ჯგუფის კუნთებში", არ არის მექანიკურ შეცდომას და არ ეწინააღმდეგება დასკვნაში მითითებულ სიკვდილის ხანდაზმულობას.

სამხარაულის განმარტებით, 22 ივნისს ცხედრის აღმოჩენის ადგილზე გვამის გარეგნული დათვალიერების დროს ყველა ჯგუფის კუნთებში "გვამური გაშეშება" დადგინდა. მათივე თქმით, ბიუროს სამედიცინო ექსპერტიზის დეპარტამენტში ჩატარდა გვამის სასამართლო-სამედიცინო ექსპერტიზა, რა დროსაც დადგინდა, რომ "გვამური გაშეშება" ექსპერტიზის ჩატარების მომენტში უკვე მოხსნილი იყო. ცხედრის გარეგნული დათვალიერება შემთხვევის ადგილზე 15:05 საათზე დაიწყო, ხოლო სასამართლო-სამედიცინო ექსპერტიზა — 19:15 საათზე.

"გვამურ გაშეშებასთან" დაკავშირებით ეროვნულ ბიუროს ორი განმარტება მოაქვს. როგორ ორივე მოყვანილ წყაროშია აღნიშნული, "გვამური გაშეშების" განვითარება და მოხსნა ე.ი. კუნთების მოდუნება გარემოს ტემპერატურაზეა დამოკიდებული:

"ციტატა: გვამური გაშეშების პროცესი ინტენსიურად მიმდინარეობს და პირველი დღე-ღამის ბოლოს ყველა ჯგუფის კუნთს მოიცავს. ასეთ მდგომარეობაში კუნთი იმყოფება საშუალოდ 1-2 დღე, რის შემდეგაც თანდათანობით იწყება გვამური გაშეშების მოხსნა ე.ი. კუნთების მოდუნება. გაშეშების მოხსნა ისე, როგორც მისი განვითარება, დიდად არის დამოკიდებული გარემოს ტემპერატურაზე. მაგალითად, ოთახის ტემპერატურის პირობებში, კუნთების მოდუნება ჩვეულებრივ ორი დღე-ღამის დასასრულს ან მესამე დღე-ღამის დასაწყისში ვითარდება. დაბალი ტემპერატურის დროს კი გაშეშება უფრო ხანგრძლივი დროის განმავლობაშია შენარჩუნებული". (თეიმურაზ გორდელაძე. ექიმი პათოლოგანატომი, სასამართლო ექიმი, მედიცინის მეცნიერებათა დოქტორი, აკადემიკოსი, პროფესორი. სახელმძღვანელო — სასამართლო მედიცინა. თბილისი 2008წ.)

ციტატა: გაშეშება უმაღლეს დონეს 24 საათის განმავლობაში აღწევს, შემდეგ იწყება თანდათანობით კუნთების მოდუნება და გაშეშება იხსნება 2-3 დღის შემდეგ... გვამის გაშეშება მჭიდროდ არის დაკავშირებული მრავალ შინაგან და გარეგან ფაქტორთან. ცივ გარემოში გაშეშება გვიან ვითარდება და დიდხანს ძლებს, რამდენიმე დღეს და კვირასაც კი. გვამში აუტოლიზური პროცესები და ლპობა სწრაფად იწვევს გაშეშების მოხსნას, რასაც ადგილი აქვს მაღალ ტემპერატურაზე გვამის ყოფნისას...". (ბესიკ კილასონია. მედიცინის მეცნიერებათა დოქტორი, პროფესორი. საქართველოს მედიცინის მეცნიერებათა აკადემიის აკადემიკოსი, საქართველოს სასამართლო ექიმთა ასოციაციის პრეზიდენტი. სახელმძღვანელო —სასამართლო მედიცინა. თბილისი 2011)".

ამასთან, ექსპერტიზის ეროვნული ბიურო განმარტავს მოსაზრებებს ქალა-ფუძის მოტეხილობასთან დაკავშირებით.

"თვალბუდეების მიდამოში სისხლნაჟღენთების არსებობა ერთმნიშვნელოვნად არ ნიშნავს ქალას-ფუძის მოტეხილობას. ექსპერტიზის დროს, მოხდა თავის ქალას ძვლების უშუალოდ ვიზუალური, დეტალური დათვალიერება, რის საფუძველზეც კატეგორიულად დადგინდა ქალა-ფუძის მოტეხილობის არ არსებობა. რენტგენოლოგიური გამოკვლევა საჭიროა მხოლოდ მაშინ, როდესაც ვიზუალურად ვერ ხერხდება უშუალოდ უბნის დათვალიერება", — აცხადებენ ბიუროში.

რა წერია დასკვნაში და რას ამბობენ ექსპერტები

შაქარაშვილის ცხედრის ექსპერტიზის დასკვნაში, რომელიც 10 ივლისს გასაჯაროვდა, აღნიშნულია, რომ გვამის ადგილზე დათვალიერების დროს "გვამური გაშეშება გამოხატული იყო ყველა ჯგუფის კუნთებში". უკვე სასამართლო-სამედიცინო ექსპერტიზის დროს კი "გვამური გაშეშება" მოხსნილი იყო.

სწორედ "გვამური გაშეშების" ჩანაწერი გახდა იმის მიზეზი, რის გამო დამოუკიდებელი ექსპერტები ფიქრობენ, რომ გიორგი შაქარაშვილის სხეული წყალში 4 დღე არ იყო. ამის შესახებ მთავარი არხისა და ფორმულას მიერ მომზადებულ სიუჟეტებში უკრაინელი კრიმინალისტი გალინა კარმოშინა და ცენტრ ემპათიას ხელმძღვანელი მარიამ ჯიშკარიანი საუბრობენ.

შაქარაშვილის დაკარგვიდან მის პოვნამდე 84 საათია გასული, ექსპერტები განმარტავენ, რომ ამდენი ხნის განმავლობაში გაშეშება ვერ გაგრძელდება.

სამხარაულის ექსპერტიზის დასკვნაში წერია ისიც, რომ სიკვდილის დადგომიდან ცხედრის შემოწმებამდე გასულია 48 საათზე მეტი დრო, თუმცა უკრაინელი ექსპერტი ამ მოსაზრებას არ იზიარებს.

"მე ექსპერტიზის პასუხების და ფოტოების საფუძველზე გადაჭრით შემიძლია ვთქვა რომ ის 48 საათზე ნაკლები დროის გარდაცვლილია, რადგან წარმოუდგენელია გვამური გაშეშებები ცხედარს ჰქონდეს 84 საათის მანძილზე", — განუცხადა კარმოშინამ მთავარ არხს. (ტელეკომპანიის თარგმანი)

ჯიშკარიანის აზრით, კი, შესაძლოა, ცხედარი წყალში რამდენიმე საათი იყო და არა რამდენიმე დღე.

"ხელების მდებარეობა მიუთითებს, რომ გაშეშება არ არის გავლილი. თუ გაშეშება არ არის გავლილი, შეგვიძლია, ვივარაუდოთ, რომ გარდაცვლილი დიდი ხნის მკვდარი არ არის. შემიძლია ზუსტად გითხრათ, რომ 19 ივნისს არ არის გარდაცვლილი. ყველანაირი სიმპტომია, რომ ცხედარი 4 დღე არ იყო წყალში. შესაძლოა, იყო რამდენიმე საათი და შემდეგ იპოვეს", — ამბობს ჯიშკარიანი ფორმულასთან.

ამის შემდეგ დამოუკიდებელმა ექსპერტმა, ალექსანდრე გეჯაძემ განაცხადა, რომ აღნიშნული ჩანაწერი "გვამურ გაშეშებაზე", სავარაუდოდ, შეცდომაა. გეჯაძე იმ საექსპერტო კომპანიას წარმოადგენს, რომელიც შაქარაშვილის ოჯახმა დაიქირავა.

მისი თქმით, გვამური გაშეშება გამოხატული ვერ იქნებოდა ყველგან, მაშინ, როცა სხეულზე ლპობითი პროცესებია დაწყებული, რაც დასკვნაში, ასევე, აღნიშნულია.