პარლამენტის საგარეო ურთიერთობათა კომიტეტის თავმჯდომარის, ირაკლი ბერაის თქმით, რუსეთის საგარეო უწყების მიერ გავრცელებული განცხადება პროვოკაციული და მთლიანად რეგიონისთვის საფრთხის შემცველია.

საუბარია განცხადებაზე, სადაც ოკუპანტი ქვეყანა ბოლო პერიოდში რუსი მესაზღვრეების მიერ მოქალაქეების გატაცებას ეხმაურება და საქართველოს, აშშ-ს საელჩოსა და სახელმწიფო დეპარტამენტს პროვოკაციაში ადანაშაულებს.

"გარდა იმისა, რომ არის პროვოკაციული, ასევე, არის ძალიან სერიოზული საფრთხის შემცველი, როგორც საქართველოსთვის, ასევე, მთელი რეგიონული უსაფრთხოებისთვის. რუსული განცხადებები და მოწოდებები, რა თქმა უნდა, ცინიზმით სავსე ქმედებებია. ვინც უნდა შეასრულოს ნაკისრი ვალდებულებები, ეს არის რუსეთის ფედერაცია. რუსეთს შეუსრულებელი აქვს ცეცხლის შეწყვეტის შესახებ შეთანხმება", —განაცხადა ბერაიამ.

რუსული მხარის მტკიცებით, ზაზა გახელაძემ, რომელიც 11 ივლისს რუსმა სამხედროებმა დაჭრეს და გაიტაცეს , ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა.

ქვეყანა, რომელსაც საქართველოს ტერიტორიები 2008 წლის შემდეგ ოკუპირებული აქვს, "პოლიტიკური სპექტაკლის" მოწყობაში თბილისს ადანაშაულებს. თუმცა პრობლემის მოგვარების გზად რუსეთი მხოლოდ საზღვრის დელიმიტაცია/დემარკაციაში ხედავს.

საგარეო უწყება მოუწოდებს საქართველოს, მოლაპარაკებების ფორმატების გამოყენებით პროვოკაციას ბოლო მოუღონ:

"საქართველოს ხელისუფლებისგან ველით ენერგიულ მუშაობას თავის მოსახლეობასთან, რათა საზღვრის უკანონო კვეთა აღარ მოხდეს".

ამასთან, რუსეთის საგარეო საქმეთა სამინისტრო პროვოკაციულს უწოდებს სახელმწიფო დეპარტამენტისა და აშშ-ს საელჩოს განცხადებებს, რომელიც საქართველოს ტერიტორიული მთლიანობისა და სუვერენიტეტის მხარდაჭერას ეხება.