მოდელი ვალენტინა სამპაიო ისტორიაში პირველი ღიად ტრანსგენდერი მოდელი გახდა, რომელიც Sports Illustrated-ის საცურაო კოსტიუმების ნომერში გამოჩნდება.

23 წლის ბრაზილიელი მოდელი სპეციალურად შეირჩა გამოცემისთვის, რომელიც 21 ივლისიდან იქნება ხელმისაწვდომი.

"მადლობა, რომ მხარს მიჭერთ სიყვარულის, თანაგრძნობისა და ერთიანობის გზავნილის გავრცელებაში", — ამბობს სამპაიო.

Sports Illustrated-ის ბოლო გამოცემაში გამოქვეყნებულ ესეში მოდელი საუბრობს ამ ისტორიულ მომენტზე და ტრანსთემისათვის მის მნიშვნელობაზე. "როგორც წესი, იყო ტრანსგენდერი, ნიშნავს გამუდმებით აწყდებოდე დახურულ კარებს ადამიანების გულებსა და გონებაში. ჩვენ გვიწევს დაცინვის, დამცირების, შეშფოთებული რეაქციების და ფიზიკური ძალადობის ატანა, მხოლოდ იმიტომ, რომ ვარსებობთ", — ამბობს იგი, — "ჩვენი შესაძლებლობა, ვიზრდებოდეთ მოსიყვარულე ოჯახში, რომელიც მიგვიღებს, სკოლის პერიოდში ბედნიერი ვიყოთ ან ვიპოვოთ ღირსეული სამსახური, წარმოუდგენლად შეზღუდული და რთულია".

მოდელი მადლობას უხდის გამოცემას იმის დაფასებისთვის, რომ "სხვა ყველაფერზე წინ, იგი ადამიანია".

ესეში სამპაიო ასევე საუბრობს მის სამშობლოში დაღუპულ ტრანსგენდერ ადამიანებზე. "ბრაზილიის ჩრდილოეთით მდებარე შორეულ და მოკრძალებულ მეთევზეების სოფელში დავიბადე და გავიზარდე", — წერს იგი, — "[ეს] მშვენიერი ქვეყანაა, თუმცა ტრანსთემისადმი განხორციელებული ძალადობის და მკვლელობის შემთხვევებით ერთ-ერთი მოწინავეა — ამგვარი დანაშაული თითქმის სამჯერ მეტი ხდება, ვიდრე აშშ-ში".

Advocate-ის ცნობით, გასულ წელს მსოფლიოში 330 ტრანს და არაბინარული იდენტობის მქონე ადამიანი მოკლეს, აქედან 130 მკვლელობა ბრაზილიაში მოხდა.

ენტონი რამოსი, Sports Illustrated-ის ახალი სახეების აღმოჩენის ხელმძღვანელი, Los Angeles Times-თან ამბობს:

"Sports Illustrated-ის საცურაო კოსტიუმების გამოცემა უერთდება სხვა უამრავ ორგანიზაციას — აშშ-ის სკაუტი გოგოებიდან მის სამყარომდე, რათა ცნოს უბრალო ფაქტი, რომ ტრანსგენდერი ქალები ქალები არიან. ისეთი ნიჭიერი გოგოები, როგორიც ვალენტინა სამპაიოა, იმსახურებენ განსაკუთრებულ ყურადღებას და თანაბარ შესაძლებლობებს. Sports Illustrated-ში შეტანილი მისი წვლილი წინ გადადგმული ნაბიჯია, მაშინ, როცა სამოდელო ინდუსტრია მეტი ინკლუზიურობით აგრძელებს განვითარებას".

2017 წელს სამპაიო ასევე პირველი ტრანსგენდერი მოდელი გახდა, რომელიც Vogue Paris-ის გარეკანზე გამოჩნდა, 2019 წელს კი კვლავაც პირველი იყო საკუთარი თემიდან, ვინც Victoria's Secret-მა დაიქირავა საკუთარი ვარდისფერი ხაზისთვის. ეს მოხდა ერთი წლის შემდეგ, რაც კომპანიის მარკეტინგის აღმასრულებელმა ხელმძღვანელმა, ედ რეიზეკმა Vogue-ს უთხრა, რომ ტრანსგენდერი მოდელები არ გამოჩნდებოდნენ საცვლების ბრენდების ჩვენებებზე, "რადგან ჩვენების შოუ ფანტაზიას ჰგავს". რეიზეკმა გასული წლის აგვისტოში დატოვა კომპანია.