ჩაცმისა და სუფრასთან ქცევის ეტიკეტის შესასწავლად, თბილისის მერიის თანამშრომლებისთვის, დედაქალაქის ბიუჯეტიდან თანხების გამოყოფას BBC-იც გამოეხმაურა.

როგორც BBC წერს, თბილისის მთავრობა კრიტიკის ქარცეცხლში გაეხვა მას შემდეგ, რაც მერიისა და საკრებულოს 38 თანამშრომლისთვის შესაბამისი ტრენინგის ჩასატარებლად ტენდერი გამოაცხადა. ტრენინგის საჭიროებასთან დაკავშირებით კი, ბრიტანულ ტელეარხს მუნიციპალური სერვისების განვითარების სააგენტოს უფროსის მოადგილის, ნათია ლატარიას მიერ ტელეკომპანია რუსთავი 2-სთვის მიცემული ინტერვიუ მოჰყავს, სადაც ის აღნიშნავს, რომ ოფიციალური შეხვედრებისა და მიღებების განუყოფელი ნაწილია ჩაცმისა და სუფრასთან მოქცევის მანერები.

BBC ამ საკითხის შესახებ საზოგადოების მიერ ფეისბუკში გამოხატულ აღშფოთებასაც შეეხო. ბოლოს კი აღნიშნა, რომ თბილისის მერმა, დავით ნარმანიამ თავის თანამშრომლებს მსგავსი გადაწყვეტილების მიღებისას „მეტი სიფრთხილისკენ“ მოუწოდა.