დავით ნარმანიამ 6 დეკემბრის თბილისის მთავრობის სხდომაზე, მერიის თანამშრომლებისთვის ჩაცმისა და სუფრასთან მოქცევის წესის სწავლების შესახებ, კომენტარი გააკეთა. იგი რუსთავი 2-ის ეთერში, გადაცემა P.S.-ის სიუჟეტს გამოეხმაურა, სადაც საუბარია, რომ ეტიკეტის წესებს მერიისა და საკრებულოს 38 თანამშრომელს შეასწავლიან, შემდეგ კი ისინი რჩევებს უკვე სხვებს მისცემენ.

ნარმანიას თქმით, ამას მათ კანონი ავალდებულებთ და მისი აზრით, ზოგადად, უნდა გადამზადნენ კიდეც თანამშრომლები, რათა სიახლეებს არ ჩამორჩნენ, თუმცა თბილისის მერმა ორგანიზატორებს მოუწოდა, რომ ტრენინგების დაგეგმისას აქცენტი უფრო მნიშვნელოვან საკითხებზე გაამახვილონ:

"საკანონმდებლო ვალდებულებაც რომ არ იყოს, მე პირადად მივიჩნევ, რომ ეტაპობრივად, მერიის უწყების სხვადასხვა მიმართულებით თანამშრომლები აუცილებლად უნდა გადამზადდნენ, რათა არ ჩამოვრჩეთ მიმდინარე სიახლეებს, ტენდენციებს და განსაკუთრებით ადგილობრივი თვითმმართველობის ინოვაციური განვითარების თვალსაზრისით, იმ სიახლეებს, რაც მსოფლიოს ძალიან ბევრ ქალაქშია აპრობირებული და რაც ქალაქის მართვას და ზოგადად, საჯარო სერვისების მიწოდებას გაცილებით უფრო ამარტივებს, ვიდრე მოძველებული მომსახურების ფორმები და სისტემებია. აქედან გამომდინარე, ვფიქრობ რომ ჩვენ გაცილებით უფრო მნიშვნელოვან და ინოვაციურ ტრენინგებზე უნდა ავიღოთ აქცენტი და ალბათ ამ შემთხვევაში ასეც უნდა გაგვეკეთებინა, რაც უკეთესი შედეგის მომტანი იქნება ვიდრე პროტოკოლისა და ეტიკეტის სწავლება. ამიტომ, მოვუწოდებ მერიის თანამშრომლებს იყვნენ ყურადღებით, როცა ვგეგმავთ თანამშრომლეთა გადამზადების ტრენინგებს".