მიუხედავად იმისა, რომ მთავრობის დაპირებისამებრ, საწვავზე აქციზის ფასი ჯერ არ გაზრდილა, სექტემბრიდან დღემდე, საქართველოში საწვავის ფასი 15-17 თეთრით გაიზარდა და ბოლო 2 წლის მაქსიმუმს 5 დეკემბერს მიაღწია.

მსხვილი ბენზინგასამართი სადგურების ქსელებში (ვისოლი, გალფი, სოკარი და ა.შ.) ჯერ კიდევ სექტემბერში 1 ლიტრი პრემიუმის ტიპის საწვავის ფასი 1,77 ლარიდან, 1,79 ლარამდე მერყეობდა, ახლა კი მისი ღირებულება 1,94 ლარს აღწევს.

ასევე 15-17 თეთრით არის გაზრდილი სხვა კატეგორიის საწვავის, მათ შორის ევრო დიზელისა და ევრო რეგულარის ფასებიც.

როგორც On.ge-ს ვისოლში განუცხადეს, საწვავის ყველა კატეგორიაზე ფასი 4 დეკემბერს კიდევ გაიზარდა:

"4 დეკემბერს შეიცვალა ფასი და ყველა კატეგორიაზე 4-5 თეთრით მოხდა მატება".

გალფში, საწვავის ფასმა, გაზის გარდა, დეკემბერში ყველა კატეგორიაზე მოიმატა. ნავთობკომპანიის საიტზე ჩანს, რომელი სახეობის საწვავი რამდენით გაძვირდა.

ფოტო: გალფი

"საწვავი გაძვირდა საერთაშორისო ბაზარზე და ამან გამოიწვია ჩვენთან ნავთობის გაძვირება, მთავარი მიზეზი ესაა, რა თქმა უნდა კავშირია ლარის კურსთან, რადგან უცხოური ვალუტით ვყიდულობთ მას, მაგრამ პირველი მიზეზი არის საერთაშორისო ბაზარზე ნავთობის ფასის ზრდა" - On.ge-სთან საუბრისას განაცხადა გალფის მარკეტინგის დეპარტამენტის უფროსმა, ნინო ჯიბლაძემ.

საერთაშორისო ბაზარზე 1 ბარელი ნედლი ნავთობის ფასი ჯერ კიდევ 2014 წლის ზაფხულში 115 აშშ დოლარს აღწევდა, შემდეგ კი ფასმა კლება დაიწყო და 2016 წლის თებერვალში თითქმის 25 დოლარამდე ჩამოვიდა. მიმდინარე წლის ივნისში ნავთობის ფასი 1 ბარელზე კვლავ 50 დოლარამდე გაიზარდა, აგვისტოში - 40 დოლარამდე შემცირდა და მას შემდეგ მისი ღირებულება სწორედ 40-დან 50 დოლარის ფარგლებში მერყეობს.

ერთ-ერთი მნიშვნელოვანი ფაქტორი, რასაც შესაძლოა, ნავთობპროდუქტების ფასების ზრდაზე გავლენა მოეხდინა, ლარის გაუფასურებაა. 2016 წლის მაისში 1 აშშ დოლარის ღირებულება 2,14 ლარი იყო, 2016 წლის 6 დეკემბრისთვის კი 2,57 ლარია, შესაბამისად, ნავთობიმპორტიორებს იგივე რაოდენობის საწვავის შესაძენად უფრო მეტი ლარის დახარჯვა უწევთ. On.ge შეეცადა ნავთობიმპორტიორთა ასოციაციასთან დაკავშირებას, თუმცა, ამ ეტაპზე ეს ვერ მოხერხდა.

მოსალოდნელია, რომ 2017 წლიდან საწვავზე ფასი კიდევ გაიზრდება, რადგან მთავრობამ აქციზის გადასახადის გაზრდა დააანონსა. არსებული ინფორმაციით, 1 ტონა აქციზის ღირებულება 250-დან 500 ლარამდე გაიზრდება, 1 ტონა დიზელზე - 150-დან 400 ლარამდე, 1000 მ3 გაზზე კი 80-დან 200 ლარამდე. აქციზის გადასახადის ზრდა 1 ლიტრი საწვავის ღირებულებას, დაახლოებით 20-25 თეთრით გაზრდის.