როგორც უკვე ვიცით, გასული წლის გახმაურებული შვედურ-ქართული პროექტის And Then We Danced-ის რეჟისორმა ახალი ფილმი პოსტერის გამოქვეყნებით დააანონსა.

ფილმის შესახებ სხვა კონკრეტული ინფორმაცია უცნობი იყო, თუმცა პოსტერის ვიზუალით ვივარაუდეთ, რომ მისი სიუჟეტი კვლავ საქართველოსთან, ამავდროულად კი თურქეთთან იქნებოდა დაკავშირებული. სულ ცოტა ხნის წინ ScreenDaily-სთვის მიცემულ ინტერვიუში კი რეჟისორმა ლევან აკინმა დაადასტურა, რომ ეს მართლაც ასე იქნება:

"როცა And Then We Danced-ისთვის ინფორმაციებს ვაგროვებდი, ბევრი ისტორია მოვისმინე, რომელიც შემდეგ თავიდან ვეღარ ამოვიგდე. რაც ბევრს ვიგებდი, მით უფრო მეტ თემას ვაწყდებოდი, რომელიც ჩემთან კავშირში იყო და განსაკუთრებით ერთი მათგანის ხელიდან გაშვება არ შემეძლო. ამან კი თბილისიდან სტამბოლამდე მოგზაურობასთან მიმიყვანა", — ამბობს ქართული წარმოშობის შვედი რეჟისორი.

ფოტო: Amar Aljic / Instagram

ლევან აკინი შვედეთში დაიბადა, თუმცა მისი მშობლები წარმოშობით საქართველოდან არიან, რომლებიც შვედეთში წასვლამდე თურქეთში ცხოვრობდნენ. ამიტომაც აკინისთვის უცხო არ არის ამ ორი ქვეყნის კულტურაც:

"ბავშვობაში შვედეთიდან თურქეთის გავლით საქართველოში მივემგზავრებოდი, რათა ზაფხულობით ბებია-ბაბუა მომენახულებინა. ახალი ფილმის ისტორიის შთაგონებაც ესაა, რაც ჩემთვის ძალიან ინტიმურ ემოციებს უკავშირდება".

მომავალი ფილმის სახელწოდება Passage იქნება და მისი გადაღებები როგორც როგორც სტამბოლში, ისე საქართველოში იქნება. რეჟისორის განცხადებით, ამ ფილმის ერთ-ერთი ყველაზე დიდი შთაგონება ასევე თურქული მუსიკა იყო.

View this post on Instagram

Hejira. Passage. Both Sides Now

A post shared by Levan Akin (@levanakin) on

ლევან აკინი უკვე მუშაობს ფილმის სცენარზე და დაგეგმილი აქვს, რომ თურქეთში უფრო მეტი დრო გაატაროს ინფორმაციის მოძიებისა და დეტალების დაზუსტებისთვის. კინოსურათის წინასწარი მოკლედ აღწერა ასეთია: "იმ ადგილის სიყვარულისა და ლტოლვის ისტორია, რომელსაც ეკუთვნი. ეს არის ამბავი არჩეულ ოჯახებზე, რომლებიც იმ ადამიანებმა შექმნეს, ვინც თავიანთი ადგილი ბიოლოგიურ ოჯახებში ვერ იპოვეს".

შეგახსენებთ, რომ ლევან აკინის გეი დრამამ And Then We Danced გასულ წელს მრავალ მაყურებელთან ერთად კრიტიკოსებისგან დადებითი შეფასებები დაიმსახურა: ის აჩვენეს კანის კინოფესტივალზე, დასახელდა არაერთი უცხოური გამოცემის რჩეულ ფილმად და ამავდროულად ისეთი პრესტიჟული ფესტივალების გამარჯვებული გახდა, როგორებიცაა ჩიკაგოს, სარაევოს და ა.შ.