პრემიერმინისტრი გიორგი გახარია აცხადებს, რომ მისთვის მნიშვნელობა არ აქვს 2020 წლის საპარლამენტო არჩევნებში სიის რომელი ნომერი იქნება. მისი მტკიცებით, არსებული გამოწვევების პირობებში არც მას და არც მთავრობის წევრებს არ აქვთ დრო, რომ საარჩევნო სიაზე იმსჯელონ.

ამასთან, გახარიამ განაცხადა, რომ ქართული ოცნების თავმჯდომარე, ბიძინა ივანიშვილი შესაძლოა, საარჩევნო სიაში ვიხილოთ.

"მე ვიქნები ბოლო ნომერი, არანაირი მნიშვნელობა არ აქვს ჩემთვის რომელი ნომერი ვიქნები. გულწრფელად გეუბნებით, ჩემი ძირითადი ამოცანაა, მთავრობის ძირითადი ამოცანაა დღეს არის, პირველ რიგში, პანდემია. ის, რომ ჩვენ მაქსიმალურად ვაკონტროლოთ რისკები. მეორე ამოცანა გახლავთ, კიდევ უფრო მნიშვნელოვანი, ჩვენი ეკონომიკური აღდგენა პოსტპანდემიურ პერიოდში. და მესამე, პანდემიისა და ეკონომიკური კრიზისი პირობებში წყნარად, მშვიდად და დემოკრატიულად ჩავატაროთ არჩევნები", — განაცხადა გახარიამ.

როგორც გახარია ამბობს, ახლა მნიშვნელოვანი სანიმუშო არჩევნების ჩატარება, რომელიც დაასრულებს სპეკულაციებს, რომელსაც "ბევრი ვაი-პოლიტიკოსი ქმნის".