საქართველოში ევროკავშირის ელჩი, კარლ ჰარცელი ახალი საარჩევნო კანონმდებლობის დამტკიცებას ეხმაურება და ამბობს, რომ სასურველი იქნებოდა უფრო ამბიციური რეფორმების განხორციელება. მისივე თქმით, წუხს, რომ ახალი საარჩევნო კანონმდებლობის უფრო ფართო პოლიტიკური მხარდაჭერის მიღების შესაძლებლობა ხელიდან იქნა გაშვებული.

"სასურველი იქნებოდა უფრო ამბიციური რეფორმების განხორციელება ეუთო/ოდირის მიერ რეკომენდებულ საკვანძო სფეროებში, როგორებიცაა ამომრჩეველზე ზეწოლა, დავების განხილვა და საარჩევნო კომისიების დაკომპლექტება; ვწუხვარ, რომ ახალი საარჩევნო კანონმდებლობის უფრო ფართო პოლიტიკური მხარდაჭერის მიღების შესაძლებლობა ხელიდან იქნა გაშვებული", — განაცხადა ჰარცელმა.

ამავე დროს, ელჩი მიესალმება ისეთი ცვლილებების მიღებას, როგორიცაა: საბიუჯეტო სექტორში დასაქმებულთა მიერ საარჩევნო კამპანიაში მონაწილეობის უფლებების რეგულირება, მეორე ტურებისთვის მკაფიოდ განსაზღვრულ რეგულაციები, ქალთა წარმომადგენლობის მხარდაჭერა, საარჩევნო კომისიების წევრებთან მიმართებაში ინტერესთა კონფლიქტის გამორიცხვასთან დაკავშირებული წესების დახვეწა და პარტიების დაფინანსების რეგრესული მოდელის დანერგვა.

როგორც ჰარცელმა აღნიშნა, მოახლოვებული საპარლამენტო არჩევნები გადამწყვეტი მომენტი იქნება საქართველოს მიერ აღებული ვალდებულების — დაიცვას დემოკრატიული პროცესები და კანონის უზენაესობა — შესრულების შესაფასებლად.

"ველი, რომ პროცესი ახალი წესების დაცვით ჩატარდება და არჩევნებისთვის შემდგომი მზადება განხორციელდება; ევროკავშირი მზადაა გააგრძელოს საქართველოსთვის დახმარების გაწევა მისი მიზნის მიღწევაში, რაც შემოდგომაზე არჩევნების უმაღლესი სტანდარტების შესაბამისად ჩატარებას გულისხმობს", — აცხადებს კარლ ჰარცელი.

2 ივლისს პარლამენტმა საარჩევნო კოდექსის ცვლილებათა პაკეტს მესამე მოსმენით მხარი დაუჭირა. ცვლილებების თანახმად, საარჩევნო უბნიდან 25-მეტრის რადიუსში ამომრჩეველთან მიახლოება და მისი შეფერხება დასჯადი იქნება, თუმცა ეს არ შეეხება მედიისა და ეგზიტპოლების ჩამტარებელი ორგანიზაციებისთვის.

ამასთან, კანონით განისაზღვრა, რომ პარტიულ სიაში ყოველი მეოთხე განსხვავებული სქესის წარმომადგენელი უნდა იყოს.