"ქართული ოცნების" რეჟიმმა დღეს ეროვნული გამოცდების განახლებული პროგრამა წარგვიდგინა, რომელშიც საგანგაშო ცვლილებებია შეტანილი. პროგრამიდან ამოღებულია ისეთი ნაწარმოებები, რომლებიც მკითხველს დიქტატორული რეჟიმისადმი კითხვის ნიშნებს უჩენს, საქართველოს დამოუკიდებლობის ნარატივს ატარებს, აკრიტიკებს ურაპატრიოტიზმს, და რუსეთს ჩვენი ქვეყნის დაუძინებელ მტრად წარმოაჩენს. ამოღებულია ილია ჭავჭავაძის, აკაკი წერეთლის, პაოლო იაშვილის, სულხან-საბა ორბელიანის, ალექსანდრე ყაზბეგის და სხვათა უმნიშვნელოვანესი ნამუშევრები.

ამ ნაწარმოებების საპირწონედ "ქართულ ოცნებას" ეროვნული გამოცდების პროგრამაში შესატანად რამდენიმე ლიტერატურული მაკულ...ნაწერი გვინდა, ვურჩიოთ. აშკარაა, რომ განათლებული თაობის აღზრდა და ქართულ-ევროპული ღირებულებების შენარჩუნება მათთვის პრიორიტეტი არაა, ამიტომ, შეგვიძლია აბიტურიენტებს უკვე ისეთი ნამუშევრები ვასწავლოთ, რომელთაც თავად ჩვენი მაღალჩინოსნები მიიჩნევენ შედევრებად.

ლადო კახაძის ლექსები

ბევრმა არ იცის, რომ ლადო (ვლადიმერ) კახაძე, პარლამენტარად ქცეული ექიმი, მგოსანიც ყოფილა. ბატონი ბიძინასადმი მისი ერთგულება ალბათ, მალე დასაჩუქრდება რაიმე მნიშვნელოვანი პრივილეგიით, გარდა პარლამენტარის 12 000 ლარიანი ხელფასისა, მაგალითად, ეროვნულ გამოცდაში მისი რომელიმე ლექსის შეტანით. ჩვენ ამ ლექსს ვუწევთ რეკომენდაციას, შეიძლება მოღალატე პოლიტიკოსებზე დააფიქროს აბიტურიენტები:

ქვეყანა ისევ ფუქსავატობს . . .
რასაც ადრე სხვები აკეთებდნენ, დღეს მაგას სხვები აკეთებენ.
ტყუილი ისევ რჩება ეგრეთწოდებული სიმართლის წყაროდ.
ბატონობენ ბატონობას ცუდად ნასწავლი ბატონები.
ეს უკვე იყო . . .შედეგი _ არაფერი. არაფერი კი არა, არაფერზე უარესი
იმედის საბოლოოდ გადაწურვა. გაუკეთებლის შეუძლებლად მონათვლა და გამართლება გაუკეთებლობისა.
ისევ ბევრი და არაფრისმქონე.
ისევ ბევრი და არამართალი.
მოჩვენებითი მოძრაობაა, ისიც მხოლოდ ადგილზე.
უღირსი ღირსების ტარება.
შუქგაუმტარი მინები.
არადროულად დათესილი ყანა.
ღვინოზე ძვირი ლუდი.
კლასიკა კლასიკურად კვანტგამოდებული.
გუნდრუკის მკმეველთა ქორო.
საფლავზე მისული ჟურნალისტები.
ურთიერთობის განსაკუთრებულ სოციალურ ფორმად ფორმალურად ქცეული ოჯახი.
უგვანოთა სილამაზის კონკურსები.
უხმოთა არიები.
არამხედველთა ნახატები.
დაუძლურებული ძლიერები.
დაუღეჭავად მყლაპველები.
მაღალი ქონდრისკაცები.
მოკლეთ ფაქტი სახეზეა . . .

არჩილ თალაკვაძის ლექსი ალუჩა

პარლამენტის თავმჯდომარის მოადგილე, არჩილ თალაკვაძე, დაოჯახებაზე მსხმოიარე ალუჩის შეხედვამ დააფიქრა. ამ პერვერსიული ფიქრებისა და დეპუტატის მარტოსულობის გაანალიზება ეროვნული გამოცდის თემაში ალბათ, საინტერესო დავალება იქნება.

ალბათ ასეა,
დროა, უკვე ცოლი შევირთო.
ალუჩას სოფლად რა ხანია
შვილი გაუჩნდა...
ჩვენ ხომ ერთად გვიხაროდა
გაზაფხული.
მე მინდა ქალი ტანადი
და სრული,
დიდგვაროვანთა შთამომავალი,
თამარი კი სასეირნოდ წაიყვანა ქარმა,
რომელიც ქრის
მხოლოდ ერთი მიმართულებით:
რომ მარტოობა არის ჩემთვის
თავადის ასული.

ირაკლი კობახიძის დაბრუნება ტერანუოვაში

""ქართული ოცნების" სიის მესამე ნომერი, თბილისის სახელმწიფო უნივერსიტეტისა და დიუსელდორფის უნივერსიტეტის სამართლის მაგისტრი, დიუსელდორფის უნივერსიტეტის სამართლის დოქტორი, თბილისის სახელმწიფო უნივერსიტეტის პროფესორი, ევროპის საბჭოს საპარლამენტო ასამბლეის ვიცე-პრეზიდენტი, აქ შევჩერდები, გახლავართ მე, ირაკლი კობახიძე" — ასე გააცნო თავი საზოგადოებას პრემიერ-მინისტრმა საპარლამენტო სიის წარდგენის დროს და იმის აღნიშვნა კი გამორჩა, რომ მხატვრული ლიტერატურის დამსახურებული ავტორია. დაბრუნება ტერანუოვაში კობახიძემ სტუდენტობისას დაწერა, მაშინ, როცა სამართალს სწავლობდა, რათა შემდეგ თავისივე ქვეყანაში სამართლის პოვნა შეუძლებელი გაეხადა. ვფიქრობთ, ამ ნაწარმოების საგამოცდო პროგრამაში შეტანაც აუცილებელია.