სოციალური აგენტების ფიქსირებული ანაზღაურება და ხელშეკრულების ვადები გაიზარდა. ამის შესახებ ინფორმაციას ჯანდაცვის სამინისტრო ავრცელებს. მათი ცნობით, დღეიდან სოციალურ აგენტების ფიქსირებული ანაზღაურება 150 ლარით გაიზარდა და შესაბამისად, მათთვის სამგზავრო თანხის სახით გამოყოფილი ანაზღაურების ოდენობა 250 ლარს შეადგენს.

ასევე, 100 ლარით გაიზარდა უფროსი სოციალური აგენტების ფიქსირებული ანაზღაურებაც და 450 ლარის ნაცვლად ისინი 550 ლარს მიიღებენ.

მათივე ინფორმაციით, 6 თვემდე გაზარდა სოციალური აგენტებისთვის ხელშეკრულების ვადებიც, ხოლო წლის ბოლოდან სოციალური აგენტების ნაწილს 1 წლიანი, ნაწილს კი უვადო ხელშეკრულებები გაუფორმდებათ, რაც სამინისტროს განმარტებით, განპირობებულია მათი სამუშაო სტაჟიდან გამომდინარე.

მათივე ცნობით, ცვლილებები შეეხო და გაიზარდა სოციალური აგენტების შვებულების, იძულებითი მოცდენის და წახალისების ანაზღაურების ოდენობაც. ამ შემთხვევაში, სოციალური აგენტები ბოლო სამი თვის საშუალო ანაზღაურებას მიიღებენ.

როგორც ჯანდაცვის მინისტრის მოადგილემ, გიორგი წოწკოლაურმა აღნიშნა ცვლილებები სამინისტროს, სოციალური მომსახურების სააგენტოში მიმდინარე რეორგანიზაციის შედეგია, რაც სხვა სიახლეებთან ერთად სოციალური აგენტების სამუშაო პირობების გაუმჯობესებას ისახავდა მიზნად.

"ეს პროექტი დიდი ხანია არსებობს, ის იანვარში უკვე გვქონდა. თუმცა რეორგანიზაციის პროცესი პანდემიის პირობებში შენელდა. დღეიდან კი ამის შესაძლებლობა მოგვეცა", — განაცხადა წოწკოლაურმა.

სოციალური აგენტებს 3 ივლისს გაფიცვა ჰქონდათ დაანონსებული, ისინი შრომითი პირობებისა, სოციალური აგენტების ფიქსირებული ხელფასის (80 ლარი) საარსებო მინიმუმთან შეუსაბამობაში მოყვანას, შრომით ხელშეკრულებების გადახედვასა და სატრანსპორტო ხარჯების ანაზღაურებას ითხოვდნენ.