პარლამენტის ვიცე-სპიკერის, მამუკა მდინარაძის აზრით, პრემიერმინისტრმა, გიორგი გახარიამ "ოპოზიციის რადიკალური ნაწილი 2-ჯერ ჩააგდო ნოკაუტში". ასე გამოეხმაურა ის იმ ფაქტს, რომ ოპოზიცია დროებით წყვეტს ბოიკოტს და პრემიერის ანგარიშის წარდგენაზე დასწრებას აპირებს.

"გუშინ ფეისბუქზე დადეს ვარჯიშის შედეგები, რომ შეეშინებინათ ეტყობა. არც ეს ვარჯიში გაჭრის იმიტომ, რომ მარტო ორატორობა არ არის საკმარისი, მართალი უნდა იყო, რომ მოიგო პოლიტიკური დებატები. ამ შეთხვევაში გახარიას და ქართული ოცნების მხარეს არის სიმართლე. ეს იგებს დებატებს და არა რაღაც მოთელვები", — განაცხადა მან ევროპული საქართველოს მიერ გავრცელებულ ფოტოებზე, რომლებშიც პრემიერის მოსმენისთვის მზადებაა ასახული.

ხვალ, 26 ივნისს პრემიერმინისტრი პარლამენტის წინაშე წლიური ანგარიშით წარსდგება. აქამდე ბოლო ორი თვის განმავლობაში პრემიერი პარლამენტში 2-ჯერ იყო მისული. პირველად კორონავირუსის პრევენციისთვის განხორციელებული ნაბიჯების შესახებ წარადგინა ანგარიში, მეორედ კი ინტერპელაციის მეთოდით იყო მისული. მმართველი გუნდი აცხადებს, რომ ორივე შემთხვევაში გახარიამ ოპოზიცია "დაამარცხა".