პანდემიის შემდეგ პირველად, ამერიკის პრეზიდენტმა, დონალდ ტრამპმა ოფიციალური ვიზიტით პოლონეთის პრეზიდენტი ანდრეი დუდა მიიღო. შეხვედრის შემდეგ გამართულ პრესკონფერენციაზე, სადაც ლიდერებმა ჟურნალისტების კითხვებს უპასუხეს დუდამ საქართველოს მიმართ რუსეთის აგრესიაც ახსენა.

"რუსეთს სამწუხაროდ საკმაოდ დიდი იმპერიალისტური ამბიციები აქვს, რომელიც "გაცოცხლდა", ბოლო ათწლეულში, მაგალითად რუსეთი თავს დაესხა საქართველოს, 2014 წელს უკრაინას, მას აქვს ოკუპირებული ლუგანსკი და დონეცკი", — თქვა დუდამ.

პრეზიდენტებმა შეხვედრაზე ეკონომიკური და სამხედრო თანამშრომლობა განიხილეს. პოლონეთის პრეზიდენტის თქმით, მისთვის მნიშვნელოვანია ამერიკის მხარდაჭერა და დაცვა.

ტრამპმა განაცხადა, რომ მომავალში გერმანიიდან გამოყვანილი ამერიკელი ჯარისკაცების ნაწილი პოლონეთში იქნებიან გაგზავნილნი. ანდრეი დუდამ აღნიშნა, რომ იმედი აქვს მომავალში ამერიკასთან უფრო მჭიდრო ალიანსის.