ნაციონალური მოძრაობის დეპუტატის, სალომე სამადაშვილის განცხადებით, გიორგი რურუას მიმართვა, მისი პატიმრობის მიუხედავად ოპოზიციამ საარჩევნო ცვლილებების კენჭისყრაში მონაწილეობა მიიღოს, მათთვის არაფერს ცვლის. სამადაშვილის განმარტებით, ეს პრინციპის საკითხია და ეხება არამხოლოდ რურუას, არამედ ქვეყნის სამართლებრივ-პოლიტიკურ გარემოს.

"ეს არის სწორი მოქალაქეობრივი პოზიცია იმ თვალსაზრისით, რომ მას არ სურს მისი პიროვნული საკითხი გახდეს დაბრკოლებად იმ მნიშვნელოვანი ცვლილებებისთვის, რომელიც ეხება კონსტიტუციას. მაგრამ ჩვენთვის, რა თქმა უნდა, ეს პოზიცია არაფერს არ ცვლის იმიტომ, რომ ჩვენთვის ეს არის პრინციპის საკითხი და ეს არ შეეხება მხოლოდ გიორგი რურუას. ეს შეეხება იმ სამართლებრივ და პოლიტიკურ გარემოს, რომლითაც ჩვენ მივდივართ შემდეგ არჩევნებზე და შეთანხმებას, რომ ჩვენს ქვეყანაში პოლიტიკური ნიშნით მართმსაჯულება არ უნდა განხორციელდეს", — განუცხადა მან რუსთავი 2-ს.

მთავარი არხის დამფუძნებელი, გიორგი რურუა მიიჩნევს, რომ საარჩევნო სისტემის ცვლილებების მესამე კენჭისყრაში ოპოზიციის მონაწილეობა აუცილებელია. ამის შესახებ მან Facebook-ზე დაწერა.

"მინდა გამოვეხმაურო რვა მარტის შეთანხმებას! ჩემი პოზიცია ასეთია, მესამე მოსმენით კენჭისყრაში მონაწილეობა აუცილებელია, მნიშვნელობის აღნიშნვას აღარ დავიწყებ. მესმის ჩემი მეგობრების პოზიციაც, მეც ასე მოვიქცეოდი მათ ადგილას. ჩემი მძევლად დატოვება ახლა მეორეხარისხოვანია. უპრინციპობას ჩვენ ვერავინ დაგვაბრალებს. პროპორციული საარჩევნო კანონის მიღება იყო და არის საზოგადოების მთავარი მოთხოვნა, ასევე ჩვენი საერთაშორისო მეგობრების თხოვნაც", — წერს რურუა.

გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

გიორგი რურუას გათავისუფლება კენჭისყრაში მონაწილეობისთვის ოპოზიციის მთავარი მოთხოვნაა. ისინი ამბობენ, რომ 8 მარტის შეთანხმებაში, გიგი უგულავასა და ირაკლი ოქრუაშვილის გარდა, რურუას გათავისუფლებაზეც არის საუბარი. ნაციონალური მონაწილეობა კენჭისყრაში არ მონაწილეობს. რაც შეეხება ევროპულ საქართველოს, პარტიამ პირველი მოსმენის დროს საარჩევნო სისტემის ცვლილებას მხარი იმ მოტივით დაუჭირა, რომ მმართველ გუნდს არ ჩაეგდო, მეორე მოსმენისას კი, რადგან ხელახალი კენჭისყრის შესაძლებლობა არსებობს, მონაწილეობა არ მიიღო. პარლამენტმა ცვლილებებს ოპოზიციის გარეშე, 115 ხმით დაუჭირა მხარი. მესამე და საბოლოო კენჭისყრა მომდევნო კვირაში, სავარაუდოდ, ორშაბათს იქნება.