მაისის ბოლოს ბაზარზე ახალი სტრიმინგ სერვისი HBO Max გამოჩნდა, რაც იმას ნიშნავს, რომ სატელევიზიო შოუებისა და ფილმების მოყვარულებს კიდევ უფრო მრავალფეროვანი არჩევანი ექნებათ მომავალში დროის გასაყვანად.

ამის დასამტკიცებლად კომპანია მუდმივად ახალ პროექტებს აანონსებს და მათ შორის ერთ-ერთი Close Enough-ია, რომელიც ანიმაციური სერიალების მოყვარულებს განსაკუთრებულად დააინტერესებთ.

სერიალის 2017 წელს უნდა გამოსულიყო, თუმცა მისი პრემიერა სამი წლით გადაიდო და მაყურებლები მის ხილვას 9 ივლისიდან შეძლებენ:

შეიძლება იმ მაყურებლების გაოცება რთულია, რომლებიც Rick And Morty-ის მსგავსი ანიმაციების გამო ყოვლად უჩვეულო და დაუჯერებელი სიუჟეტური ხაზის მქონე შოუებს მიეჩვივნენ, თუმცა ცოტა ხნის წინ გავრცელებულ ტრეილერში ვხედავთ, რომ არც Close Enough-ს აკლია აბსურდულად კომიკური ელემენტები.

სერიალის ოფიციალურ აღწერაში ვკითხულობთ:

"სიურეალისტური ანიმაციური კომედია დაქორწინებული წყვილის, მათი ხუთი წლის შვილისა და ორი განქორწინებული საუკეთესო მეგობრის შესახებ მოგვითხრობს, რომლებიც ერთად ცხოვრობენ ლოს-ანჯელესში. შოუს პერსონაჟები ცდილობენ გაუმკლავდნენ 30 წლის ასაკის შემდგომ დამდგარ გარდამავალ პერიოდს, როცა იზრდები, მაგრამ არ ბერდები. მათი ცხოვრება შეიძლება იდეალური არაა, მაგრამ მასთან საკმაოდ ახლოსაა".

ტრეილერიდან ვიგებთ, რომ ეს ახალი ანიმაციური სერიალი დიდი დოზით შეიცავს წყვილებს შორის პრობლემებსა და სექსთან დაკავშირებულ საკითხებს, შესაბამისად ის თავისი სპეციფიკური იუმორით ზრდასრული მაყურებლებისთვისაა გათვლილი.