ფეისბუქის მომხმარებლები რამდენიმე დღეა მსჯელობენ, უნდა იწერებოდეს თუ არა "ერთ-ერთი" დეფისით. პოპულარული მოსაზრების მიხედვით, სიტყვა ერთად უნდა იწერებოდეს, რადგან ორ-ორისა და სამ-სამისგან განსხვავებით, წყვილს არ გამოხატავს.

თავდაპირველად ფილოლოგიურ მეცნიერებათა დოქტორმა, რუსიკო კობახიძემ დაწერა, რომ "ერთ-ერთის" მართლწერა იცვლებოდა და სიტყვა ამიერიდან ერთად დაიწერებოდა.

თუმცა, როგორც აღმოჩნდა, საჯარო მოხელის ორთოგრაფიული ლექსიკონის ელექტრონულ ვერსიაში ტექნიკური შეცდომა გაიპარა და სინამდვილეში, "ერთ-ერთი" კვლავ დეფისით იწერება. ინფორმაცია ამის შესახებ სულაკაურის გამომცემლობის რედაქტორმა და ფილოლოგმა, ანა ჭაბაშვილმა გაავრცელა.

როგორც საჯარო მოხელის ორთოგრაფიულ-სტილისტიკური ლექსიკონის რედაქტორმა, თამარ ვაშაკიძემ გვითხრა, ბეჭდურ ვერსიაში სწორი, დეფისიანი ვერსიაა აღნიშნული:

"ერთ-ერთი ყოველთვის იწერებოდა დეფისით, გაორკეცებული სახელია და არც დამდგარა ჩემ წინაშე ეგ საკითხი, რომ გამეერთიანებინა. ტრადიციულად, სწორი ფორმა არის დეფისიანი, ამიტომ არ დგას ეს საკითხი".

ფოტო: თიკო ბურჭულაძე / Facebook

ლექსიკონის ერთ-ერთმა შემდგენელმა, თიკო ბურჭულაძემ ფეისბუქზე წიგნიდან სურათი გამოაქვეყნა იმის საილუსტრაციოდ, რომ ლექსიკონის ბეჭდური ვერსიის მიხედვით, "ერთ-ერთი" დეფისით იწერება. თუმცა მან დასძინა, რომ საკითხი აუცილებლად გადაიხედება:

"წელს ქართული მეტყველების კულტურის განყოფილება მუშაობს კომპოზიტთა ნორმებზე და, ცხადია, ეს საკითხი გადაიხედება და განიხილება. ვნახოთ, ახალი ნორმის შემუშავების შემდეგ რას დაამტკიცებს სამეცნიერო საბჭო და შემდეგ - სახელმწიფო ენის დეპარტამენტი. ასე რომ, ჯერჯერობით არაფერი შეცვლილა".

ბურჭულაძე დასძენს, რომ საჯარო მოხელის ორთოგრაფიულ-სტილისტიკური ლექსიკონის საიტზე ხარვეზი მალე გასწორდება.

ჩვენთან საუბრისას, თამარ ვაშაკიძემ ის პროცედურები განმარტა, რომელიც ენაში მართლწერის ცვლილებას უძღვის წინ. მისი სიტყვებით, თავდაპირველად გადაწყვეტილებას ენათმეცნიერების ინსტიტუტის სამეცნიერო საბჭო იღებს, ხოლო ამის შემდეგ კი ცვლილება ექსპერტთა საბჭოს კომისიაზე, სახელმწიფო ენის დეპარტამენტში განიხილება.