ISSA-ს თავმჯდომარე და ექსპერტ-ანალიტიკოსი იაგო კაჭკაჭიშვილი ორგანიზაციის ბოლო ჩატარებულ კვლევას ეხმაურება. კაჭკაჭიშვილის განცხადებით კვლევამ აჩვენა, თუ როგორ აღარ მუშაობს ქართული ოცნების პროპაგანდა ისეთ თემებზე როგორიცაა ეკონომიკური ზრდა, "დიფ სთეითი", პროევროპულ აქციებში მონაწილეობისთვის დაკავებული პირების საქმეები და ევროკავშირის "რეპუტაცია". ანალიტიკოსმა დასძინა, რომ გამონაკლისია "რუსეთთან ომის საფრთხე", "რადგან საქართველოს მოსახლეობის 49% ამ საფრთხეს აღიარებს".

"ISSA-ს ბოლო კვლევა ცხადად აჩვენებს, რომ ხელისუფლების პროპაგანდა არ/აღარ ან ცუდად მუშაობს.

აი, ამის რამდენიმე აშკარა მაჩვენებელი:

ა) ქ/ოცნება არნახულად ამაყობს საქართველოს ეკონომიკის უპრეცედენტო ზრდით და ამის საილუსტრაციოდ საერთაშორისო ფინანსური ორგანიზაციების სტატისტიკასაც იშველიებს. ამის მიუხედავად, საქართველოს მოსახლეობას ეკონომიკური აყვავების არ სჯერა: ბოლო 2.5 (2023-25) წლის განმავლობაში უმრავლესობა საკუთარი ოჯახების ეკონომიკური მდგომარეობის უცვლელობაზე (47%), ან გაუარესებაზე (34%) საუბრობს.

ბ) ყბადაღებული "დიფ-სთეითისა" და გლობალური ომის პარტიის არსებობა და ნეგატიური გავლენები არ არის დამაჯერებელი არც საქართველოს მოსახლეობის (53%), არც თბილისის მოსახლეობის (62%) და, მით უფრო, არც პროევროპული ოპოზიციის ამომრჩევლების (75%) უმრავლესობისთვის. მეტიც, ქ/ოცნებამ თვით საკუთარი ამომრჩევლების უმრავლესობაც კი ვერ დააჯერა კონსპირაციებში (49% იჯერებს).

გ) საქართველოს მოსახლეობას არ სჯერა არც აქციების დროს დაკავებული ახალგაზრდების და არც მზია ამაღლობელის კრიმინალურობის, რასაც ასე გულდასმით ამტკიცებს პროპაგანდა. 73% ემხრობა აქციების დროს დაკავებული ადამიანების განთავისუფლებას. მეტიც: თვით ქ/ოცნების ამომრჩევლების 40% ემხრობა ამას.

დ) ქ/ოცნებამ, ბევრი მცდელობის მიუხედავად, ვერ მოახერხა ევროკავშირის "გაშავება" მოსახლეობის თვალში. საქართველოს მოსახლეობის 83% მხარს უჭერს ევროკავშირში გაწევრებას. თვით ქ/ოცნების ამომრჩევლების 68% ემხრობა ამას. კი, ევროკავშირის იდეის განსხვავებული ინტერპრეტაცია შემოიტანა ქ/ოცნებამ თავის ამომრჩევლებში ("ორბანიც და ფიცოც ევროპაა"), მაგრამ მაინც — "ლიბერალურ ევროკავშირთან" გაერთიანება ჯერ კიდევ ყველაზე პოპულარულია.

შემიძლია, ეს ჩამონათვალი გავაგრძელო...

ერთადერთი პროპაგანდისტული მესიჯი, რომელიც მეტ-ნაკლებად ცოცხალია, რუსეთთან ომის საფრთხეს ეხება. როგორც საქართველოს, ისე თბილისისა და რეგიონების მოსახლეობაში რესპონდენტების აზრი გაყოფილია იმის შესახებ, თუ, რუსეთ-უკრაინის ომის შემდეგ, რამდენად დიდი ან მცირე საფრთხე არსებობდა რუსეთსა და საქართველოს შორის საომარი მოქმედებების დაწყების (საქართველოს მოსახლეობის 49% ამ საფრთხეს აღიარებს, ხოლო 44% — არა).

სწორედ ამიტომაა უაღრესად მნიშვნელოვანი (სხვა დანარჩენთან ერთად) საქართველოში დემოკრატიის განვითარებისთვის და რეალური ცვლილებებისთვის, რომ რუსეთის წარუმატებლობა სულ უფრო აშკარა გახდეს რუსეთ-უკრაინის ფრონტზე," — წერს იაგო კაჭკაჭიშვილი.

ასევე იხილეთ: