აქტივისტი ალბი კორძაია სოციალურ ქსელში წერს, რომ ბათუმის საქალაქო სასამართლოში პოლიციელ ბიძინა ჟამერაშვილის სარჩელის საფუძველზე 5-დღიანი თავისუფლების აღკვეთა მიესაჯა.

"სასამართლო ბიძინა ჟამერაშვილის საქმეზე ჩატარდა დღეს, ბათუმის საქალაქო სასამართლოში. მოსამართლე ეკატერინე კახნიაშვილი. განაჩენი პატიმრობა 5 დღე. ვემზადები, მივდივარ ზაჰესის იზოლატორთან," — წერს აქტივისტი.

28 ივნისს, აქტივისტმა ვიდეო გამოაქვეყნა, რომელშიც ის ბათუმის ერ-ერთ სასტუმროში სინდისის პატიმრის, მათე დევიძის საქმეში ფიგურანტ ბიძინა ჟამერაშვილს შემდეგი სიტყვებით მიმართავს — "ბიჭები ციხეში უნდა იყვნენ და შენ ბათუმში უნდა ისვენებდე?! [...] ბიჭები გყავს ციხეში გაშვებული შე უნამუსო, შე ნამუსგარეცხილო".

ჟამერაშვილმა აქტივისტს უპასუხა, რომ მან "დიდი პრემია აიღო". 30 ივნისს, აქტივისტმა განაცხადა, რომ ბიძინა ჟამერაშვილმა მას უჩივლა.

ცნობისთვის, 4 ივნისს აქტივისტ ალბი კორძაიას თეა წულუკიანის შეურაცხყოფის ბრალდებით 10-დღიანი პატიმრობა შეეფარდა. გადაწყვეტილება მოსამართლე მანუჩარ ცაცუამ მიიღო.

ალბი კორძაიას 11 აპრილს მომხდარ ინციდენტს ედავებოდნენ, როდესაც მან თეა წულუკიანს სახლთან ხმის გამაძლიერებლით "რუსეთის მონას" და "ქვეყნის მოღალატეს" სკანდირებდა. აქტივისტების თეა წულუკიანის სახლთან მას შემდეგ შეიკრიბნენ, რაც ოცნების ვიცე-სპიკერმა დროებით საგამოძიებო კომისიაზე გიორგი ანწუხელიძეს "უაზროდ გაწირული ვიღაცის პიარისთვის" უწოდა.