Super Puma-ს ვერტმფრენი, რომელიც სასაზღვრო პოლიციის ბალანსზე იყო და 2018 წელს ავარიულად ჩამოვარდა, დღემდე კახეთში, ართანას მთებშია. ამის შესახებ რეპორტაჟი TV პირველმა მოამზადა. მათი ინფორმაციით, ვერტმფრენი რთულად მისადგომ ადგილზეა ჩამოვარდნილი და უკვე ორი წელია უპატრონოდაა.

ინფორმაცია იმის შესახებ, რომ სასაზღვრო პოლიციის ვერტმფრენი თელავის რაიონის სოფელ ართანასთან, სასაზღვრო პოსტ ანდარაზართან ავარიულად დაეშვა, 2018 წელს შინაგან საქმეთა სამინისტრომაც გაავრცელა. თუმცა უწყებას განცხადებაში არ აქვს მითითებული, რომ საუბარია მიხეილ სააკაშვილის პრეზიდენტობის დროს შეძენილ Super Puma-ზე, რომელიც პოლიტიკური დაპირისპირების საგანი არაერთხელ გახდა. ითქვა მხოლოდ ბორტის ნომერი — GBP– 10020.

მაშინ შსს-მ თქვა, რომ ვერტმფრენი ლაგოდეხის სამმართველოს სასაზღვრო ქვედანაყოფებში "გეგმიური როტაციის მიზნით" მიფრინავდა და ავარიული დაშვების შედეგად, შსს-ს სამი მფრინავი, ერთი მესაზღვრე და ერთი საპატრულო პოლიციის თანამშრომელი დაშავდა. ყველა მათგანი ვერტმფრენში იმყოფებოდა.

უწყების განცხადებაში არ ყოფილა მითითება, რომ ვერტმფრენი ვერ ამოიყვანეს, შესაბამისად, შსს-ს არც იმაზე უსაუბრია, რა გახდა Super Puma-ს მთებში დატოვების მიზეზი. უცნობია ისიც, მაშინ დაწყებული გამოძიება დასრულდა თუ არა და დადგა თუ არა ვინმეს პასუხისმგებლობის საკითხი.

ამ თემასთან დაკავშირებით კითხვები TV პირველმა ქართული ოცნების გენერალურ მდივანს, კახა კალაძესა და პრემიერმინისტრ გახარიას დაუსვა, რომელიც 2018 წელს შს მინისტრი იყო და ვერტმფრენზე პასუხისმგებლობაც მის უწყებას ეკისრებოდა. გახარიამ კითხვას არ უპასუხა, კალაძემ კი თქვა, რომ "ეს რაღაც სიახლეა":

"არ ვიცი, მე არ მაქვს ინფორმაცია და პირველად მესმის, რასაც საუბრობთ".

On.ge-მ შსს-ს მიერ გავრცელებული ბორტის ნომერი ინტერნეტ რესურსებში მოძებნა და შესაბამისი ინფორმაცია იპოვა საიტზე Aviation Safety Network, რომელიც, როგორც მითითებულია, ავიაკატასტროფებისა და უსაფრთხოების შესახებ ცნობებს ოფიციალური წყაროებიდან, მთავრობებიდან აგროვებს. 2018 წლის 12 ივლისს ვერტმფრენის ავარიული დაშვების შესახებ ინფორმაცია მათთანაც იძებნება, ამასთან, მითითებულია, რომ დაზიანებულია Aerospatiale AS 332L1 Super Puma, რეგისტრაციის ნომერი კი შსს-ს მიერ გავრცელებულ ბორტის ნომერს ემთხვევა — GBP 10020.

ფოტო: Aviation Safety Network

კიდევ ერთი მნიშვნელოვანი დეტალია ის, რომ TV პირველის ინფორმაციით, გარდა იმისა, რომ ორი წლის განმავლობაში ხელისუფლებამ ვერტმფრენი მთებიდან არ ამოიყვანა, ამის საშუალებას არც კერძო კომპანიას აძლევს. ავიაკომპანია აირზენას წარმომადგენელი TV პირველთან ამბობს, რომ მზად იყვნენ ეს ვერტმფრენი კატასტროფის ადგილიდან საკუთარი ხარჯით ამოეყვანათ და შეეკეთებინათ, თუმცა ხელისუფლებისგან თანხმობა ვერ მიიღეს:

"ჩვენ არ გვაქვს საშუალება 25-მილიონიანი საჰაერო ხომალდი ვიყიდოთ, მაგრამ ვიფიქრეთ, რომ 150 ათასი თუ დაგვიჯდა ჩამოტანა და რემონტი მაქსიმუმ 1 მილიონი, რატომაც არა? ძალიან ძვირადღირებული ვერტმფრენია. მისი საბაზრო ფასი 25 მილიონი დოლარის ფარგლებშია. გავიფიქრეთ, თუ მაინც ლპება და არავის სჭირდება, ავიღებდით და გამოვიყენებდით შიდა გადაფრენებისათვის".

ზუსტად 5 წლის წინ, 2015 წლის 13 ივნისს, ვერეს ხეობაში წყალდიდობის დროს, Super Puma-ს ვერტმფრენები ეკონომიკის სამინისტროს ბალანსზე იყო. ისინი სამაშველო ოპერაციაში არ გამოიყენეს, რასაც მოქალაქეების ნაწილსა და ოპოზიციაში კრიტიკა მოჰყვა.

Super Puma-ს მსგავსი სამი ვერტმფრენი 2010 წელს მიხეილ სააკაშვილის მთავრობამ იყიდა. სტუდია მონიტორის გამოძიებით დადგინდა, რომ 2014 წლიდან ისინი ბიძინა ივანიშვილთან დაკავშირებულ ავიაკომპანია ავიასერვისს გადაეცა. 13 ივნისისის სტიქიის ღამეს, სამაშველო სამუშაოებისთვის ვერტმფრენები ვერ გამოიყენეს.