დღეს 19:00 საათზე თბილისის მე-17 საერთაშორისო კინოფესტივალის ფარგლებში კინოთეატრ "ამირანის“ მე-2 დარბაზში ფრანსუა ტრიუფოს წიგნის პრეზენტაცია გაიმართება. მას საფრანგეთში მოღვაწე კანადელი მსახიობი და ფრანგული ახალი ტალღის ერთ-ერთი მნიშვნელოვანი წარმომადგენელი ალექსანდრა სტიუარტი უმასპინძლებს ნუცა ალექსი-მესხიშვილთან ერთად. წიგნის პრეზენტაციის შემდეგ 21:00 საათზე სტიუარტი მაყურებელს წარუდგენს ფრანსუა ტრიუფოს ფილმს "ამერიკული ღამეები“, რომელშიც თავად მონაწილეობს.

დღესვე, 30 ნოემბერს, 21:00 საათზე კინოთეატრ "ამირანის" 1-ელ დარბაზში გაიმართება ოსკაროსანი რეჟისორის, ჰიუ ჰადსონის 2016 წლის ფილმის, "ალტრამირას" თბილისური პრემიერა. 1 დეკემბერს 14:00 საათზე კი ჰიუ ჰადსონი ქართველ რეჟისორ დიტო ცინცაძესთან ერთად მასტერკლასს ჩაატარებს და კინომოყვარულებს თავისი შემოქმედების შესახებ უამბობს.

"ალტამირა" ანტონიო ბანდერასის მონაწილეობით მე-19 საუკუნეში გვაბრუნებს და ერთ-ერთი უდიდესი აღმოჩენის, ალტამირას ნახატების შესახებ გვიყვება. ცხრა წლის მარია საუტუოლა და მამამისი მარსელინო გამოქვაბულში ბიზონის სრულყოფილ ნახატს პოულობენ, მაგრამ მარიას ღვთისმოშიში დედა ვერ ეგუება იმ აზრს, რომ წინარეისტორიულ ხანაში ასეთი საოცარი ხელოვნების ნიმუშები შეიძლება შექმნილიყო. კათოლიკური ეკლესია ამას ბიბლიურ ჭეშმარიტებაზე შეტევად აღიქვამს. წინარეისტორიული ხანის მოწინავე მკვლევარი კარტალიაკი კი მარსელინოს აღმოჩენას ყალბს უწოდებს. ოჯახს საკუთარი სიმართლის დამტკიცება უწევს.

ღონისძიებები თბილისის მე-17 საერთაშორისო კინოფესტივალის ფარგლებში იმართება. კინომოყვარულებს 4 დეკემბრის ჩათვლით მრავალფეროვანი პროგრამა ელით.