ნაციონალური მოძრაობის დეპუტატის, რომან გოცირიძის თქმით, დიდი უბედურება არ იქნება თუ ოპოზიცია მაჟორიტარობის ერთიან კანდიდატებზე ვერ შეთანხმდა. ამ თემაზე მან მთავარ არხთან ისაუბრა და აღნიშნა, რომ ერთიან კანდიდატზე საუბრის გასაგრძელებლად პარტია მზადაა.

"რეალურად, საკონსტიტუციო ცვლილებები ხელს უწყობს პარტიების ორიენტირებას პარტიულ სიაზე და არა მაჟორიტარულ ოლქებზე. ესეც მოცემულობაა. ამიტომ არც ის იქნება დიდი უბედურება, თუ ვერ მოხდა შეთანხმება, თუმცა სჯობს, რომ მნიშვნელოვან ოლქებში ეს მოხდეს", — თქვა რომან გოცირიძემ.

დეპუტატის თქმით, უამრავი პარტიაა, რომელსაც ცვლილებების შემდეგ შანსი გაუჩნდათ დეპუტატი ძალიან მარტივად გაიყვანონ. გოცირიძის თქმით, მათთვის მნიშვნელოვანია არა მაჟორიტარული, არამედ პროპორციული სია და 30-ვე ოლქში თავიანთი კანდიდატის დაყენება.

დღეს, 4 ივნისს ევროპული საქართველოს დეპუტატმა, გიგა ბოკერიამ ნაციონალურ მოძრაობას მოუწოდა, რომ რაც დიდია პარტიის გავლენა, მით მეტია მისი პასუხისმგებლობა.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.